ԱԺ-ում շարունակվում է 2014 թ-ի պետական բյուջեի կատարման մասին քննարկումները: ՀՀ Քաղաքաշինության նախարար Նարեկ Սարգսյանը տեղեկացրեց, որ նախարարությանը 2014թ-ին հատկացվել է 8.7 մլրդ դրամ, որից 7.7 մլրդ դրամը կապիտալ ծախսերի համար:
«Այս ցուցանիշի սահմաններում 2014թ-ին ընդհանուր առմամբ իրականացվել են 34 կրթական, 6 մարզական օբյեկտների հիմնանորոգում և կառուցում, 4 մշակութային օբյեկտների շինարարություն»,- հայտնեց քաղաքաշինության նախարարը:
Նախարարը հայտնեց նաևˋ 13 օբյեկտների ուսումնասիրություններից հետո եկել են եզրկացության , որ այդ օբյեկտների վրա, որոնք վթարային են, հատկացումներ անել չի կարելի, իսկ դրանց համար նախատեսված գումարը հանվել և ուղղվել է աղետի գոտի:
ՀՀԿ-ական պատգամավոր, ԱԺ տնտեսական հարցերի հանձնաժողովի նախագահ Վարդան Այվազյանի համար այս ամենը թվաց զավեշտալի:
«Դուք ասում եքˋ օբյեկտները նայել ենք, հանել ենք ցուցակից, որովհետև վթարային են, կներեք պատգամավորներն այդքան հնարավորություն չունեն գնան-տեսնեն, որ ասում եքˋ լավն է, հետո ասում եքˋ խոտան է, ո՞նց հասկանանք, ո՞վ է այդ նախկին նախագծի հեղինակն ու պատասխանատուն, որը վերցրել է նաև ֆինանսավորում, հիմա էլ ֆինանսավորումը հանվել է ու ասվում էˋ շինարարության համար նպատակահարմար չէ»,- հետաքրքրվեց Վարդան Այվազյանը:
«Բազմաթիվ դպրոցներ, որոնք կառուցվել են պատերազմի տարիներին, բացարձակ չեն համապատասխանում սեյսմիկ անվտանգության նորմերին ու այդ ուղղությամբ այժմ լուրջ աշխատանքներ են կատարվում»,- պարզաբանեց Քաղաքաշինության նախարարն ու նաև նշեց` լուրջ տեխնիկական ուսումնասիրության են կատարվել, որից պարզվել էˋ պետք է քանդվեն ու նորից կառուցվեն:
Վարդան Այվազյանն էլ հետաքրքրվեցˋ «19 45թ-ի, թե՞ 2004թ-ի պատերազմի ժամանակ»:
Այնուհետև, ՀՀԿ-ական պատգամավորը խորհուրդ տվեց գումար վերցնել և մոնիտորինգ անել` որ շենքն ինչ վիճակում է ու տվյալներ ներկայացնել: Ի պատասխան` Նարեկ Սարգսյանն ասացˋ ունեն նման ուսումնասիրության արդյունքներ, որոնք,սակայն, դեռևս վերջնական չեն:
