Տարածաշրջանային հարցերով փորձագետ Արմեն Պետրոսյանի կարծիքով՝ Նահանգների կողմից՝ տասնյակ հեռակառավարվող հրթիռներով Սիրիայի նախագահ Բաշար ալ Ասադի ավիաբազաներից մեկին հասցված հարվածը նախազգուշական էր: Այս մասին այսօր լրագրողների հետ հանդիպմանն ասաց փորձագետը՝ խոսելով Սիրիայում ստեղծված իրավիճակից:
«Բավական գրագետ կազմակերպված եւ իրականացված հարված էր. ինչո՞ւ, որովհետեւ նախ՝ հարվածից առաջ զգուշացվել է ռուսական կողմը, ինչպես նաեւ տարածաշրջանում Միացյալ Նահանգների դաշնակիցները: Բացի դա, հարվածն իրականացվել է այնպես, որ հնարավորինս քիչ մարդկային կորուստներ լինեն»,- ասաց փորձագետը:
Նկատենք, որ ԱՄՆ-ի այս քայլը, ըստ էության, պատասխանն էր այս շաբաթվա ընթացքում Սիրիայում քիմիական զենքի գործադրմամբ հարձակմանը, որի հետևանքով տասնյակ խաղաղ բնակիչներ էին զոհվել: Միացյալ Նահանգների նախագահ Դոնալդ Թրամփն էլ խստորեն քննադատել և մարդկության դեմ ուղղված վիրավորանք էր որակել տեղի ունեցածը՝ դրա հետեւում տեսնելով Սիրիայի իշխանություններին:
Փորձագետը, սակայն, համոզված է՝ իրավիճակի սրացում չի սպասվում:
«Ռուսաստանը չի գնա սրացման, կլինեն կտրուկ հայտարարություններ, սակայն հարցը կտեղափոխվի դիվանագիտական հարթակ»,- նշեց փորձագետը:
Առավել մանրամասն՝ տեսանյութում:
