«Նախարարությունը տեղյակ է համացանցում տարածված ձայնագրությունից, զեկուցագրով ներկայացվել է նախարարին կամ այս պահին նախարարի պարտականությունները կատարողին, արձագանքների մասին դեռեւս որեւէ մեկնաբանությամբ չենք կարող հանդես գալ: Առաջիկայում մենք հստակ կտեղեկացնենք»: Araratnews.am-ի հետ զրույցում ասաց ՀՀ ԿԳ նախարար Լեւոն Մկրտչյանի մամուլի խոսնակ Լուսինե Մարգարյանը, անդրադառնալով համացանցում տարածված այն ձայնագրություններին, որտեղ հստակ լսվում է, թե ինչպես են դպրոցների և մանկապարտեզների որոշ տնօրեններ ցուցակներ հավաքում ՀՀԿ-ի համար:
Հարցին, թե արդյո՞ք այս ամենը պայմանավորված չէ այն հանգամանքով, որ ԿԳ նախարարությունը հետևողական չէ եւ չի վերահսկում դպրոցներում իրավիճակը, Լուսինե Մարգարյանն ասաց. «Ձայնագրության մասին տեղյակ ենք, եւ առաջիկայում մենք ձեզ կտեղեկացնենք»:
Ի դեպ, ԿԳ դաշնակցական նախարար Լեւոն Մկրտչյանն արձակուրդ է վերցրել եւ զբաղված է նախընտրական քարոզարշավով:
Հիշեցնենք, որ այսօր Sut.am կայքի կողմից հրապարակվեց ՀՀԿ-ն չարաշահում է վարչական ռեսուրսը դպրոցներում ու մանկապարտեզներում. ձայնագրություններ հոդվածը:
Հրապարակման հեղինակները զանգահարել հանրակրթական դպրոցների և մանկապարտեզների 136 տնօրենների և, ներկայանալով Հանրապետականի շտաբից, հարցուփորձ անել հավաքագրվող ցուցակների մասին:
Ձայնագրություններում լսվում է, թե ինչպես են հանրապետության բոլոր մարզերը և Երևանի բոլոր տարածքները ընդգրկող 84 դպրոցների և 30 մանկապարտեզների տնօրենները մանրամասն պատմում իրենց հավաքագրած ցուցակների մասին:
