Ռուսաստանի Դաշնության քննչական կոմիտեն շարունակում է Կերչի պոլիտեխնիկ քոլեջում փաստով քրեական գործի նախաքննությունը:
«Առայժմ հայտնի է 17 զոհի մասին: Աճյունների նախնական զննությունը խոսում է այն մասին, որ նրանք զոհվել են հրազենային վնասվածքներից: Օպերատիվ կերպով պարզվել է երիտասարդ մարդու ինքնությունը, որը քոլեջ է եկել միջադեպից անմիջապես առաջ, որը, տեսանյութերից ելնելով, ձեռքում զենք է պահել: Նա քոլեջի 4-րդ կուրսի ուսանող 18-ամյա Վլադիսլավ Ռոսլյակովն է: Նրա մարմինը՝ հրազենային վիրավորումով, հայտնաբերվել է քոլեջի շինություններից մեկում»,- պատմել են քննչական կոմիտեից:
Ըստ նախնական տեղեկատվության՝ հրաձգությունից հետո ուսանողն ինքնասպանություն է գործել:
Ինչպես հաղորդել էինք ավելի վաղ, չորեքշաբթի կեսօրին Կերչի պոլիտեխնիկ քոլեջում պայթյուն էր որոտացել: Ավելի ուշ քոլեջում հրաձգություն և պայթյուն է իրականացրել նույն հաստատության ուսանողը, որը ինքնասպանություն է գործել: Վերջին տվյալներով՝ զոհվել է 18 մարդ:
