Անցյալ շաբաթ միանգամից երկու հեղինակավոր ուկրաինական սոցիոլոգիական ծառայություններ հաղորդեցին, որ նախագահական ընտրարշավում առաջին տեղում է հայտնվել շոումեն Վլադիմիր Զելենսկին՝ առաջ անցնելով ուկրաինական քաղաքականության վետերաններից՝ Պյոտր Պորոշենկոյից և Յուլիա Տիմոշենկոյից:
Նախընտրական արշավին իր մասնակցության մասին Զելենսկին հայտարարեց դեկտեմբերի 31-ին տեսահոլովակով, որը ոճավորված էր որպես նախագահի ամանորյա ուղերձ:
Ռուսաստանում Զելենսկին հայտնի է որպես «85-րդ թաղամաս» ստենդափ-շոուի համահիմնադիր, «Խնամիներ» սերիալի պրոդյուսեր և «Սերը մեծ քաղաքում» և «8 առաջին հանդիպումներ» կատակերգությունների հերոս:
Ուկրաինայում նրա առաջադրման շուրջ մինչ օրս բազմաթիվ վեճեր կան. ոմանք նրան համարում են գործարար Իգոր Կոլոմոյկիի դրածոն, մյուսները կասկածում են, թե Զելենսկին այսկերպ հանրայնացնում է «Ժողովրդի ծառան» հեռուստասերիալի հերթական եթերաշրջանը, որում նա հանդես է գալիս գլխավոր դերում:
Թե ինչպես կատակերգակի ժողովրդականությունը կվերածվի քաղաքական վարկանիշի, և արդյոք նա հնարավորություն ունի նախագահի թեկնածուի մասին իր սերիալի սյուժեն կյանքի կոչելու՝ ցույց կտա ժամանակը:
«Մեր գլխավոր առաքելությունն է մեր երկրի քաղաքկանություն բերել բացարձակապես նորացված մարդկանց, թարմ, պարկեշտ մարդկանց, որոնց համար ամեն ինչի վրա թքած չէ»՝ այսպես է Զելենսկին նկարագրել իր նպատակները «Ուկրաինական պրավդա» հրատարակությանը տված հարցազրույցում:
Զելենսկին կարծում է, որ պոտենցիալ ընտրողների ոչ փոքր մասը կքվեարկի իր օգտին՝ իրեն նույնացնելով «Ժողովրդի ծառան» սերիալի հերոսի հետ:
«Իմ հերոսի հետ մենք իհարկե տարբեր մարդիկ ենք: Սակայն իմ բարոյական արժեքները այս հերոսի հետ համընկնում են», ասել է նա BBC-ին:
