ԱԺ-ում շարունակում են «Դեղերի մասին» օրենքում փոփոխություններ կատարելու մասին նախագծի քննարկումը, որին անդրադարձավ նաև Զարուհի Փոստանջյանը.«Կարծես թե Հայաստանի Հանրապետությունը բացակայում է՝ ոչ միայն իր առողջապահության նախարարությամբ, այլ ընդհանուր այլ մարմիններով ևս: Այստեղ մի քանի անգամ հնչեց, որ կարող ենք շրջանցել և դեղեր գնել ոչ միայն այլ երկրներից, այլ նաև հենց Վրաստանից: Ամբողջ ամառ մենք ականատես եղանք, ինչպես ՀՀ քաղաքացիները չէին կարողանում օգտվել ՀՀ օդանավակայաններից, մասնավորապես՝ Զվարթնոց օդանավակայանից, որովհետև թռիչքուղիները թանկ էին: Նույն Վրաստանի հանրապետությունը, որն ունի նույն ծագումը՝ թե անկախության, թե´ աշխարհագրական դիրքի իմաստով, գրեթե նույն իրավիճակում է գտնվում, բայց այնտեղ թռիչքուղիները մի քանի անգամ ավելի էժան են, քան ՀՀ-ում: Նույնն էլ դեղերը, ՀՀ քաղաքացիները Վրաստանից կարող են ավելի էժան և որակով դեղ գնել, քան Հայաստանից»:
Փոստանջյանի կարծիքով՝այս օրենքը լուծում չի տալու առաջացած խնդիրներին.«Ի՞նչն է պատճառը, որ այս ոչ կատարյալ օրենքը ներկայացվել է ԱԺ, պատճառը պարզ է՝ՀՀ-ում տիրում է և´ քաղաքական,´ և տնտեսական մենաշնորհ: Դեղերի վաճառքը շատ եկամտաբեր գործունեություն է, և այդ գործունեությամբ զբաղվում են շուրջ տասնյակ տնտեսվարողներ, այսինքն՝ մոնոպոլիայի ձեռքում է, հետևաբար, այդ մոնոպոլիան, ինքն իրենով չի նահանջելու, այդ մոնոպոլիան այստեղ նաև ներկայացված լինելով, ունենալով քաղաքական մենաշնորհ, քաղաքական հովանավորչություն, պետք է ամեն ինչ անի, որպեսզի իր պայմանները լինեն դյուրին, իսկ մնացածների գործը դյուրին չլինի, որ մրցակցություն չլինի: Իսկ եթե չկա մրցակցություն, որակը ցածր կլինի, իսկ գները բարձր: Սրանից օգտվում են օլիգարխները, տուժում է ՀՀ քաղաքացին»:
Այս իրավիճակից դուրս գալու ելքը Փոստանջյանը տեսնում է՝ ՀՀ քաղաքական համակարգում համակարգային փոփոխությունների միջոցով:
