Ազգային ժողովի ՀԱԿ խմբակցության ղեկավար Լևոն Զուրաբյանը վաղ է համարում գնահատականներ տալ նորանշակ վարչապետին եւ նրա գործունեությանը, կարծում է, որ պետք է սպասել առնվազն 100 օր: Այդուհանդերձ, Զուրաբյանը թերահավատ է, որ նորանշանակ վարչապետը կարող է համակարգային փոփոխություններ իրականացնել:
«Ով էլ գա վարչապետ` այս կոռումպացված միջավայրի մեջ, որտեղ պառլամենտի մեծամասնությունը կեղծված ընտրություններով ընտրված օլիգարխների մի համակեցություն է, ռեժիմն էլ հիմնված է մենաշնորհների, ապօրինի արտոնությունների վրա, ի՞նչ պետք է անի որևէ վարչապետ»,- հայտարարեց Զուրաբյանը:
Ընդդիմադիր գործչի խոսքով` «եթե Կարեն Կարապետյանը փորձի ապամոնտաժել համակարգը, ինչպես Հայ ազգային կոնգրեսն է առաջարկում, կնշանակի` վերջ ռեժիմին»: Զուրաբյանը, սակայն, դա հնարավոր չի համարում:
ՀԱԿ պատգամավորը նաեւ «խոր հակասություններ» է տեսնում Կարեն Կարապետյանի` մենաշնորհների մասին արված հայտարարության մեջ:
Կարապետյանը, հիշեցնենք, խորհրդարանում կառավարության հետ հարցուպատասխանի ժամանակ հայտարարել էր` «եթե մենաշնորհը ձևավորվում է մրցունակ դաշտում, այլ ոչ թե ադմինիստրատիվ ռեսուրսի հաշվին, ապա այն այնքան էլ վատ բան չէ»:
«Մենք կարծում ենք` անգամ մրցունակ միջավայրում ձևավորված մենաշնորհը չարիք է: Այն, ինչ ասաց Կարապետյանը, մենաշնորհի պաշտպանություն էր: Այստեղ գուցե խոսեց իր անցյալը կամ ներկան` կապված «Գազպրոմի» հետ»,- վարչապետին հակադարձեց Լևոն Զուրաբյանը:
Շողիկ Գալստյան
