ՀՀ Կառավարության հերթական նիստում վարչապետ Կարեն Կարապետյանը հարցերը զեկուցող պաշտոնյաներին հորդորեց կարճ զեկույցներ ներկայացնել: Այս դիտողությունը նա արել էր նաեւ նախորդ նիստում: Հիշեցնենք, որ մշակույթի արդեն նախկին նախարար Հասմիկ Պողոսյանին վարչապետը հորդորել էր նախագծերը լակոնիկ ներկայացնել:
Կարապետյանը նման հորդորով այսօր դիմեց արտակարգ իրավիճակների նախարար Արմեն Երիցյանին, ֆինանսների նախարար Վարդան Արամյանին: Երբ այդ հորդորներից հետո Անշարժ գույքի կադաստրի պետական կոմիտեի ղեկավար Մարտին Սարգսյանը սկսեց երկար զեկուցել նախագծերից մեկը, վարչապետը զայրացավ:
«Պարոն Սարգսյան, ձեր հարցի զեկույցը բյուջեի զեկույցից երկար եղավ, վերջը ի՞նչ ենք անում, վերջը ասեք»,- նրան ընդհատեց Կարեն Կարապետյանը:
Այնուհետև վարչապետը նշեց, թե նորից է ուզում հորդորել կառավարության անդամներին՝ այն հարցերը, որոնք նախանիստում քննարկվել են, կառավարության նիստում պետք է հակիրճ ու ըստ էության ներկայացվեն:
