ՀՀ կառավարությունը վաղվա նիստում 4 900 եվրոյին համարժեք գումար կհատկացնի ՀՀ արդարադատության նախարարությանը` Մարդու իրավունքների եվրոպական դատարանի վճիռը կատարելու համար:
Հիշեցնենք, որ Հայաստանի երկրորդ նախագահ Ռոբերտ Քոչարյանի օրոք աշխատանքից հեռացված Գեղարքունիքի մարզի ընդհանուր իրավասության դատարանի դատավոր Անահիտ Սաղաթելյանը դիմել էր Մարդու իրավուքների եվրոպական դատարան՝ պաշտոնը վերականգնելու եւ խախտված իրավունքները վերականգնելու պահանջով:
ՄԻԵԴ-ը որոշել էր, որ Անահիտ Սաղաթելյանի իրավուքները խախտվել են և Հայաստանի Հանրապետությունը պետք է տուժածին որպես փոխհատուցում հատկացնի 4 900 եվրոյին համարժեք գումար:
Մարդու իրավունքների եվրոպական դատարանի «Սաղաթելյանն ընդդեմ Հայաստանի» գործով (գանգատ թիվ 7984/06) 2015 թվականի հոկտեմբերի 20-ի վճռի համաձայն` Հայաստանի Հանրապետությունը դիմումատուին պարտավոր է վճիռն օրինական ուժի մեջ մտնելուց հետո երեք ամսվա ընթացքում վճարել 4,900 (չորս հազար ինը հարյուր) եվրոյին համարժեք Հայաստանի Հանրապետության դրամ՝ վճռով սահմանված արդարացի հատուցման համար:
Նշված գործով Մարդու իրավունքների եվրոպական դատարանի վճռով սահմանված փոխհատուցման գումարի վճարման վերջնաժամկետը 2016 թվականի ապրիլի 20-ն է:
