Կառավարությունն այսօրվա նիստում որոշեց հավանության արժանացնել էկոնոմիկայի նախարար Կարեն Ճշմարիտյանի ներկայացրած որոշման նախագիծը:
Կառավարության այսօրվա նիստում որոշվեց «Հրազդան-ցեմենտ» ընկերությունն ազատել կուտակված մոտ 510 մլն դրամ տուգանքից: Կառավարության որոշումն օրենքի նախագծով կներկայացվի Ազգային ժողովի քննարկմանը:
Որոշման անհրաժեշտությունը պայմանավորված է «Հրազդան-ցեմենտ» ընկերության բնականոն գործունեության ապահովմամբ՝ ընկերության հարկային և պարտադիր սոցիալական ապահովագրության վճարների գծով առաջացած տույժերից ազատման միջոցով:
Նախարարը տեղեկացրեց, ոչ ընկերության գույքն այժմ գրավադրված է «ՎՏԲ Հայաստան» բանկում ու ընկերության հաշիվները գտնվում են արգելանքի տակ, իսկ գույքի հարկադիր վաճառքը կհանգեցնի ձեռնարկության տեխնոլոգիական ամբողջության խաթարմանն ու գործունեության դադարեցմանը, որի հետևանքով կփակվեն ընկերությունում առկա 450-ից ավելի աշխատատեղերը:
Որոշման նախագծում նշված է նաև, որ խնդրին լուծում տալու նպատակով, ՀՀ վարչապետի հանձնարարությամբ, շահագրգիռ կողմերի մասնակցությամբ կազմակերպվել են մի շարք քննարկումներ, որի արդյունքում նպատակահարմար է գտնվել ընկերության կողմից պետական բյուջեի հանդեպ կուտակած հարկերի մասով առաջացած տույժերի ներման միջոցով հնարավորություն ընձեռել ընկերությանը՝ շարունակելու արտադրական գործունեությունը, որի արդյունքում կմարի պարտքի մայր գումարը՝ ժամանակացույցով:
