Կաքավաձորի գյուղապետարանի հարակից տարածքը երեկ երեկոյան մարդաշատ էր: Գյուղի բնակիչները հավաքվել էին եւ միահամուռ ջանքերով միկրոավտոբուսի մեջ էին տեղավորում այն ամենը, ինչ ընդամենը մեկ օրում հավաքել էին՝ Արցախ ուղարկելու նպատակով: Չնայած ունեցած սուղ միջոցներին եւ սահմանափակ հնարավորություններին՝ կաքավաձորցիները, այնուամենայնիվ, մեծ ուրախությամբ ու հոժարակամ մասնակցել են կազմակերպված հանգանակությանը՝ իրենց հետ բերելով սնունդ, քաղցրավենիք, զինվորներին անհրաժեշտ տարբեր պարագաներ:
«Դա ոչ թե օգնություն է , այլ պարտավորություն, մեր պարտքն է լինել զինվորի կողքին: Սա դեռ քիչ է, էլի ենք օգնելու: Երբ հայտարարություն դրեցի՝ երեք օր ժամկետ էի սահմանել, բայց մեկ օրում հավաքեցին»,- մեզ հետ զրույցում ասում է Կաքավաձորի համայնքապետ Սերյոժա Մուրադյանը:
Կաքավաձորից հայոց բանակում ծառայում են մոտ չորս տասնյակ հայորդիներ, որոնց մեծ մասն առաջնագծում են: Դրա մասին գյուղացիները մեծ հպարտությամբ են պատմում:
«Էսօր գյուղից մոտ 40 զինվոր ունենք բանակում, որոնց մեծ մասն առաջին գծում են: Մեր ժողովուրդն էլ՝ ինչքան կարողանում է, օգնում է հայոց բանակին»,- նշում է կաքավաձորցի Տարոն Ստեփանյանը:
74-ամյա Մարգարիտ տատիկը, որը եւս մասնակցել է հանգանակությանը, անկեղծացավ. «Պահածո եմ բերել, տարբեր տեսակի կոմպոտներ, մուրաբաներ, ցավոք գումար չունեմ՝ գումար էլ կտայի»:
Կաքավաձորի համայնքապետ Սերյոժա Մուրադյանից տեղեկացանք նաեւ, որ գյուղացիների կողմից մոտ 500 000 դրամ էլ գումար է հավաքվել, որը կփոխանցվի «Արցախբանկ» ՓԲԸ-ին:
Շողիկ Գալստյան
