Ակնհայտ է, որ տեղի է ունենում կազմակերպված գործողություն, որը սկսվեց «Նախախորհրդարանի» անդամների մեքենաների այրումից, Գևորգ Սաֆարյանի նկատմամբ բռություն կիրառելուց, այնուհետև երեկ Հրազդանում տեղի ունեցածը:
Այս մասին Araratnews.am-ի հետ զրույցում ասաց «Բագին» փաստաբանական գրասենյակի փաստաբան Երվանդ Վարոսյանը:
Հիշեցնենք, որ վերջին տասնօրյակում մի շարք բռնություններ եղան քաղաքական և քաղաքացիական ակտիվություն դրսևորող քաղաքացիների նկատմամբ:
«Կարծում եմ մեծ թափ է հավաքել և սա շարունակական պրոցես է: Ուղղակի մի ուժ ուզում է ցույց տալ մնացածին, թե ինչի է ինքը ընդունակ և սաստել: Տևական ժամանակ է արդեն, որ քաղաքական կամք, քաղաքացիական ակտիվություն ցուցաբերող քաղաքացիների նկատմամբ կիրառվում է բիրտ ուժ: Մի ժամանակ դա դրսևորվում էր ոստիկանական բիրտ ուժի կիրառմամբ, իսկ հիմա ակնհայտ թևակոխել է կրիմինալ բիրտ ուժի կիրառման դաշտ: Ակնհայտ է, որ իշխանություններին բացարձակապես ձեռնտու չէ քաղաքական կամ քաղաքացիական ակտիվությունը երկրում»,-ասում է Վարոսյանը:
Փաստաբանը նշում է, որ բռնության ենթարկված անձիք պետք է փորձեն ներպետական բոլոր հնարավոր ատյաններով բարձրացնեն իրենց խախտված իրավունքների հարցը և հաջողության չհանսելու դեպքում դիմեն մարդու իրավունքների եվրոպական դատարան:
