«Իսլամական պետությունը» հունիսի 3-ին հարձակվել է Հասաքե քաղաքի հարավում գտնվող անչափահասների բանտի վրա` փորձելով վերահսկողություն հաստատել այնտեղ:
Ինչպես հաղորդում են արաբական լրատվամիջոցները, այդ նպատակով ԻՊ-ն մահապարտ-ահաբեկիչների միջոցով վեց ականապատ մեքենա է պայթեցրել Հասաքեի բանտի մերձակայքում:
Սիրիական ՍԱՆԱ գործակալության տեղեկացմամբ, բանակի ստորաբաժանումներից մեկը Հասաքեի շրջանում բախումների մեջ է մտել ԻՊ-ի ահաբեկիչների հետ: Բախումներն ընթացել են Սախր գյուղում, ինչի արդյունքում տասնյակ ահաբեկիչներ են ոչնչացվել:
Սիրիական օդային ուժերը ադ Դաուդիա գյուղում հարվածներ են հասցրել ապստամբներին` մեծ վնասներ պատճառելով նրանց:
Բախումները շարունակվում են Հալեպի նահանգում: Հունիսի 3-ին սիրիական ուժերը Ռազմաօդային ակադեմիայի մոտ ԻՊ-ի խմբավորում են ոչնչացրել:
Լրատվամիջոցների տեղեկացմամբ, Սիրիայի իշխանություններին մտահոգում է երկրի հյուսիս-արևմուտքի իրադարձությունները, մասնավորապես Իդլիբում տիրող իրավիճակը, որտեղ ահաբեկիչները զգալի հաջողությունների են հասել:
