Նոյեմբերի 12-ը թոքաբորբի դեմ պայքարի միջազգային օրն է: ՀՀ ԱՆ գլխավոր թոքաբան Անդրանիկ Ոսկանյանն այսօր լրագրողների հետ հանդիպմանը խոսեց Հայաստանում թոքային հիվանդությունների տարածման մասին:
Աշխարհում տարեկան թոքաբորբով հիվանդանում է 850 մլն մարդ, որից 7 միլիոնը մահանում են: Ավելի շատ հիվանդանում են մինչև 5 տարեկան երեխաները, տարեկան 1,5 մլն երեխա մահանում է այդ հիվանդությունից: Պատճառը սխալ ախտորոշումն է:
Մասնագետը հիշեցնում է՝ թոքաբորբի հիմնական ախտորոշումը ռենտգենյան հետազոտությունն է, խորխի և արյան ընդհանուր անալիզը:
Թոքաբանը հավաստիացնում է՝ թոքաբորբը բուժելի հիվանդություն է, պարզապես պետք է ժամանակին ուշադրություն դարձնել խնդրին, դիմել բժշկի, ստանալ ստացիոնար բուժում: Հիվանդությունը կանխարգելելու համար պետք է պատվաստվել:
Ինչ վերաբերում է Հայաստանում հիվանդության տարածվածությանը, մասնագետի խոսքով, ցուցանիշներն այնքան մտահոգիչ չեն` այլ երկրների ցուցանիշների համեմատությամբ: Հիվանդության հիմնական տարածման պատճառը բանախոսը համարում է օդի աղտոտվածությունը, ծխախոտի տարածվածությունը, հիգիենան չպահպանելը:
