Թերթերից մեկն այսօր գրել է, որ իշխանությունը քաղաքական կոռուպցիայի, վարչական ռեսուրսի դեմ օրինագիծ է ընդունելու մինչեւ հաջորդ ընտրությունները: Araratnews.am-ը արդարադատության նախարարությունից հետաքրքրվեց՝ նախարարությունը հավաստի համարո՞ւմ է այս տեղեկությունները: Ի պատասխան մեր հարցման՝ նախարարությունից տեղեկացրին, որ 2016-2017-ին քրեականացվել է ապօրինի հարստացումը, սահամանափակվել է պաշտոնյաների կանխիկ դրամով գործարքներ կատարելու հնարավորությունը, ընդլայնվել է հայտարարագիր ներկայացնելու պարտականություն ունեցող պաշտոնատար անձանց շրջանակը, բարձրաստիճան պաշտոնատար անձանց համար ներդրվել է շահերի հայտարարագրման ինստիտուտը:
Նախարարությունը նաև տեղեկացրել է, որ այս տարվա գարնանը ստեղծվելու է Կոռուպցիայի կանխարգելման հանձնաժողովը, որը, ի թիվս մի շարք գործառույթների, հետևելու է նաև բարձրաստիճան պաշտոնատար անձանց անհամատեղելիության պահանջների և այլ սահմանափակումների, ինչպես նաև բարձրաստիճան պաշտոնատար անձանց, բացառությամբ պատգամավորների, դատավորների և դատախազների, էթիկայի կանոնների, իրավիճակային շահերի բախման կարգավորումների պահպանմանը:
Ազգային ժողովում է ՀՀ ընտրական օրենսգրքում և մի շարք այլ օրենքներում փոփոխություններ և լրացումներ կատարելու մասին օրենսդրական փաթեթն ուղղված է հիմնականում վարչական ռեսուրսի չարաշահման դեպքերի բացառմանը: Նախագծերի համաձայն՝ արգելվում է նախընտրական քարոզչության նպատակով ծառայողական պարտականությունների իրականացման համար տրամադրված միջոցների, նյութական ու մարդկային ռեսուրսների օգտագործումը: Օրենքի պահանջի խախտման դեպքերի համար նախատեսվում է վարչական և քրեական պատասխանատվություն՝ ելնելով խախտման բովանդակությունից: Իրական կամ ենթադրյալ ազդեցությունը շահադիտական նպատակով օգտագործելու հանցակազմն ամբողջովին համապատասխանեցվել է միջազգային չափանիշներին՝ այս առումով ապահովելով քաղաքական կոռուպցիայի լիարժեք կանխարգելումը:
Սոնա Դավթյան
