ԱԺ պատգամավոր Ալեքսանդր Արզումանյանի կարծիքով հայ-թուրքական արձանագրությունների հետ կանչելու վերաբերյալ ՀՀ նախագահի որոշումը սպասված քայլ էր:
«Սա դրական քայլ էր և ՄԱԿ-ի ամբիոնից Սերժ Սարգսյանի հնչեցրած հայտարարության տրամաբանական շարունակությունն էր, որով նա «գրողի ծոցն» ուղարկեց հայ-թուրքական արձանագրությունները»,-լրագրողների հետ հանդիպման ժամանակ նշեց բանախոսը:
Լրագրողներից մեկի այն դիտարկմանը, թե արդյո՞ք նման քայլը նպատակ չի հետապնդում ՀՅԴ-ին հետ բերել կոալիցիաˋ պատգամավորը նկատեց, որ այս դեպքը ճիշտ կլինի չկապել ներքաղաքական զարգացումների հետ:
Ինչ վերաբերում է Թուրքիայի արձագանքին, ապա ըստ բանախոսիˋ Թուրքիան գիտակցում է , որ այն, ինչ կարող է անել այս տարի, չի կարող այլևս ոչ մի տարի անել, որովհետև Ցեղասպանության նկատմամբ մեծ հետաքրքրությունը միջազգային հանրության մոտ հենց այս ժամանակահատվածում է: Ըստ պատգամավորիˋ Թուրքիան շարունակում է օգտագործել լարված իրավիճակը ընդդեմ մեզˋ Հայաստանը շրջափակման մեջ պահելով:
«Թուրքիան ուզում է ցույց տալ, որ ինքը հաշտեցման եզրեր է փնտրում, բայց միթե Գալլիպոլիի ճակատամարտը ապրիլի 24-ին տեղափոխելը հաշետցման մասին է խոսում: ՀՀ նախագահի կողմից հայ-թուրքական արձանագրությունների հետկանչը կարելի է Գալլիպոլիին ուղղված պատասխան համարել»,-եզրափակեց բանախոսը:
Վարդուհի Ստեփանյան
