Հռոմի Ֆրանցիսկոս Պապը կարծում է, որ սմարթֆոնների ժամանակակից ծրագրերը չեն օգնի երիտասարդությանը երջանկություն ձեռք բերել, հայտնում է LifeNews-ը:
Կաթոլիկ եկեղեցու կողմից նշվող «Սուրբ տարվա» տոնակատարությունների շրջանակում տասնյակ երիտասարդներ են ուղևորվել Հռոմ: Ֆրանցիսկոս Պապը երիտասարդ տղաներին և աղջիկներին կոչ է արել երջանկություն փնտրել իրական կյանքում, այլ ոչ թե սմարթֆոնների ծրագրերում:
Նրա խոսքով` անգամ նորագույն և գերժամանակակից ծրագրերը չեն կարող ազատ դարձնել երիտասարդներին: Ի դեպ, Հռոմի Պապը սկզբունքորեն դեմ չէ ժամանակակից տեխնոլոգիաներին: Նա անձնական էջեր ունի Twitter, Instagram և այլ սոցիալական ցանցերում, ուր կիսվում է նորություններով: Սակայն դեմ է այն ծրագրերին, որոնք առաջարկում են «երջանկություն գտնել»:
