Երեկ Հրազդանի ՀՀԿ-ական քաղաքապետ, քաղաքապետի թեկնածու Արամ Դանիելյանի շտաբը հայտարարություն էր տարածել, որում նշվում էր, թե ընդդիմադիր պատգամավոր Նիկոլ Փաշինյանն այցելել է Հրազդան քաղաքում գործող մի շարք ուսումնական հաստատություններ ու «ճնշումներ գործադրել» հաստատությունների ղեկավարների վրա: Արամ Դանիելյանի վարձած անձինք գաղտնի նկարահանել են պատգամավորի տեղաշարժը Հրազդանում՝ փորձելով այդ լուսանկարներն ու տեսանյութը ներկայացնել որպես փաստ: Այս ամենին հետևեց Նիկոլ Փաշինյանի ֆեյսբուքյան գրառումը, ըստ որի՝ պատգամավորը պատրաստվում է դիմել ԱԱԾ:
«Հենց նոր տեսա, որ Հրազդան քաղաքում ինչ-որ մարդիկ գաղտնի հետևել են ինձ, գաղտնի տեսանկարահանել ու լուսանկարահանել: Վաղը այս կապակցությամբ պատրաստվում եմ դիմել ՀՀ Ազգային անվտանգության ծառայության տնօրեն Գեորգի Կուտոյանին, ում աշխատանքային պարտականությունների մեջ է մտնում նաև՝ իմ որպես ՀՀ բարձրաստիճան պաշտոնյա հանդիսացող անձի անվտանգության ապահովումը: ԱԱԾ-ն օրենքով սահմանված կարգով թող պարզի.
1. Ովքե՞ր են հետևել ինձ և ինչու՞ են դա արել գաղտնի:
2. Զինվա՞ծ են եղել արդյոք այդ անձինք:
3. Ու՞մ հանձնարարությամբ են իրականացրել անձեռնմխելի անձ հանդիսացող ՀՀ ԱԺ պատգամավորի գաղտնի հետևումը:
4. Արդյո՞ք Հրազդանում, կամ Երևանում իմ տեղաշարժերին հետևում են, եթե այո՝ ովքե՞ր են հետևող անձինք, ու՞մ հանձնարարությամբ և ի՞նչ նպատակով են դա իրականացնում»,- գրում է Փաշինյանը:
Փաշինյանի արձագանքից հետո, սակայն, յութուբից ջնջվել է տեսանյութը, որն իբրև փաստ ներկայացրել էր Դանիելյանի շտաբը:
Araratnews.am-ը փորձեց ՀՀԿ-ական քաղաքապետից պարզել, թե ինչու է յութուբից անհետացել այդ տեսանյութը, սակայն «ճնշված» քաղաքապետը հեռախոսազանգերին չպատասխանեց, ապա դարձավ անհասանելի:
