Հրազադանի քաղաքապետարանի «պատասխանը»՝ աղմկահարույց տեսանյութի կապակցությամբ

Ինչպես արդեն տեղեկացրել էինք օրեր առաջ Araratnews.am-ը գրավոր հարցում էր ուղարկել Հրազդանի գործող քաղաքապետ, քաղաքապետի ՀՀԿ-ական թեկնածու Արամ Դանիելյանին:  Հիշեցնենք, որ Դանիելյանի շտաբի կողմից ավելի վաղ  տարածվել էր տեսանյութ, զուգահեռ նաեւ՝ հաղորդագրություն, թե իբր Հրազդանի քաղաքապետի մեկ այլ թեկնածու «Քաղաքացիական պայմանագիր» կուսակցության անդամ Սասուն Միքայելյանի նախընտրական շտաբի պետ Նիկոլ Փաշինյանը շրջում է Հրազդանի ուսումնական հաստատություններով եւ «ճնշում» մանկավարժներին:

Թերեւս քննարկման մեկ այլ թեմա է, թե ում պատվերով էին գաղտնի  հետեւել եւ տեսանկարահանել ԱԺ պատգամավորին: Փաշինյանը դիմել է ԱԱԾ:

Վերադառնալով տեղի ունեցածին եւ որոշակի հարցեր պարզաբանելու ակնկալիքով դիմել զանգահարել էինք Արամ Դանիելյանին: Բայց գործող քաղաքապետը հայտարարել էր, թե զբաղված է, եւ խորհուրդ էր տվել  հարցերն ուղղել քաղաքապետարանի լրատվականի պետին:  Լրատվականի պետ Ալվինա Զաքարյանն էլ մեզ  հետ զրույցում պահանջել էր հարցերն ուղարկել գրավոր:

Լրատվականի պետին ուղարկել էինք հետեւյալ հարցերը:

Ինչու՞ է գործող քաղաքապետը խուսափում զրուցել լրագրողների հետ:

Օրեր առաջ համացանցում Արամ Դանիելյանի շտաբի կողմից տարածվեց տեսանյութ, որտեղ, ըստ շտաբի հայտարարության, Հրազդանի քաղաքապետի ընտրություններում առաջադրված Սասուն Միքայելյանի շտաբի պետ Նիկոլ Փաշինյանը շրջում է ուսումնական հաստատություններով եւ ճնշում մանկավարժներին: Մինչդեռ, տեսանյութում ճնշման կադրեր այդպես էլ չտեսանք: Որտեղից է նման տեղեկատվությունը:

Նույն օրը համացանցից ջնջվեց  տեսանյութը: Ի՞նչ տեղեկություններ ունեք ջնջողների մասին:

Արամ Դանիելյանը դիմել է գլխավոր դատախազություն: Ի՞նչ  փաստեր են ներկայացվել, հատկապես այն պարագայում, որ տեսանյութը ջնջվել է:

Դպրոցի տնօրենները հերքել են ճնշումների վերաբերյալ շտաբի տարածած տեղեկությունը: Չե՞ք տեսնում արդյոք հակասություն:

Սակայն, գրավոր հարցերից լրատվականից պատասխանել են միայն առաջին հարցին: Այն ներկայացնում ենք ստորեւ՝

Ինչու՞ է գործող քաղաքապետը խուսափում զրուցել լրագրողների հետ:

— Հրազդանի քաղաքապետ Ա. Դանիելյանը երբեք չի խուսափել լրատվամիջոցների հետ շփվելուց, մշտապես մասնակցել է հանրային բնույթի ամենատարբեր միջոցառումների և պատասխանել զանգվածային լրատվության միջոցների կողմից բարձրացվող տարաբնույթ հարցադրումների: Պարզապես, այս պահին առկա է աշխատանքային ծանրաբեռնվածություն ինչպես համայնքային գործընթացների, այնպես էլ՝ որպես համայնքի ղեկավարի թեկնածու առաջադրման ընթացակարգերի առումով՝ և առավել նախընտրելի ենք համարում հարցումներին պատասխանելու գրավոր տարբերակը:

Ինչ վերաբերում է մյուս բոլոր հարցադրումներին, ապա քաղաքապետարանի լրատվականից հայտնել են հետեւյալը.

—Մնացյալ բոլոր հարցադրումների մասով տեղեկացնում ենք հետևյալը, որ հիշյալ բոլոր հարցերի շուրջ մամուլում արդեն իսկ եղել են տարբեր հրապարակումներ և առավել նպատակահարմար է օգտվել արդեն իսկ արված հրապարակումներից ու արտահայտված դիրքորոշումներից:

Բոլորովին վերջերս դիմել ենք ՀՀ Գլխավոր դատախազություն, համապատասխան պարզաբանումներ ստանալու դեպքում այդ գործընթացը ևս, բնականաբար, կլուսաբանվի մամուլում:

Զարմանալի է, որ քաղաքապետարանի լրատվականից հղում են անում մամուլի ինչ-որ հրապարակումների: Հատուկ ընդգծում ենք Հրազդանի քաղաքապետի եւ համայնքային բյուջեից աշխատավարձ ստացող լրատվականի պետի  համար, այս կամ այն լրատվամիջոցին հղում անելը հարցին պատասխանել չէ: Ավելին, պատասխանում հստակ նշված չէ, թե կոնկրետ որտեղ է պարզաբանում տրվել մեր վերը նշված հարցրերի առնչությամբ: ՀՀԿ-ական քաղաքապետին եւ վերջինիս աշխատակցին չէր խանգարի ծանոթանալ ԶԼՄ-ների մասին օրենքի համապատասխան դրույթին:

Փայլակ Ֆահրադյան