Գյումրիում աշնանը տեղի կունենան ՏԻՄ ընտրություններ: Գործող քաղաքապետ Սամվել Բալասանյանի պաշտոնավորման ժամկետն ավարտվում է: Համաձայն Ընտրական նոր օրենսգրքի՝ Գյումրու քաղաքապետը կընտրվի ավագանու կազմից: Սա նշանակում է, որ առաջադրվելու ցանկություն ունեցող թեկնածուները պետք է անդամակցեն այս կամ այն կուսակցությանը:
Չնայած այն հանգամանքին, որ քաղաքապետի ընտրություններին դեռ մի քանի ամիս կա, սակայն որոշ գործիչներ ընտրապայքարի մեջ մտնելու ցանկություն արդեն իսկ ակնարկել են: Մասնավորապես, գործող քաղաքապետ Սամվել Բալասանյանը իր թիմակիցներին մոտ վստահեցրել էր, որ չի պատրաստվում աթոռը զիջել: Քաղաքապետի պաշտոնին է հավակնում նաեւ ԱԺ պատգամավոր, գյումրեցի Մարտուն Գրիգորյանը, ՕԵԿ-ից «Հայկական Վերածնունդ»-ական դարձած Հովհաննես Մարգարյանը:
Նկատենք, որ Գյումրու նախկին քաղաքապետ Վարդան Ղուկասյանն էլ՝ չնայած հայտարարել էր, թե քաղաքականությամբ այլեւս չի զբաղվելու, միեւնույն ժամանակ շեշտել է, որ երբեք չպետք է ասել «երբեք»:
Իսկ այսօր մամուլում արդեն տեղեկություններ հրապարակվեցին, որ Գյումրու ՏԻՄ ընտրություններին մասնակցելու ցանկություն ունի նաեւ ՀՀ Արդարադատության նախկին նախարար Հովհաննես Մանուկյանը:
Ո՞ւմ երազանքը կկատարվի՝ պարզ կդառնա մի քանի ամսից: Բայց հստակ է, որ եւ Ս. Բալասանյանը եւ Մ. Գրիգորյանն այս պահին անկուսակցական են: Հիշեցնենք՝ երկուսն էլ ԲՀԿ-ական էին, սակայն Ծառուկյանի՝ քաղաքականությունից հեռանալուց հետո, լքեցին «Բարգավաճ Հայաստան» կուսակցությունը: Ավելին, Սամվել Բալասանյանն արդեն կուսակցություններ փոխելու հարուստ փորձ ունի. ժամանակին նա օեկական էր, այնուհետեւ՝ բհկական, իսկ որը կլինի հաջորդը՝ ցույց կտա ժամանակը։ Թեպետ, ըստ տեղեկությունների, Սերժ Սարգսյանը թե՛ Մարտուն Գրիգորյանին, թե՛ Սամվել Բալասանյանին ոչ է ասել:
Ունի՞ արդյոք ՀՀԿ-ն Գյումրու քաղաքապետի իր թեկնածուն: Araratnews.am -ի հետ զրույցում ՀՀԿ Շիրակի մարզային կառույցի ղեկավար Սահակ Մինասյանն ասաց, թե որոշում այս պահին չունեն: « Դեռ ժամանակ կա, քննարկումներ կլինեն, եւ դրա մասին կտեղեկացնենք բոլորին: Մի հարց է հստակ, որ այդ հարցը դեռ չի կարող քննարկվել, որովհետեւ ՏԻՄ ընտրությունները Գյումրիում եւ Վանաձորում, ըստ նոր ԸՕ-ի, իրականացվելու է համամասնական ընտրակարգի միջոցով, այսինքն տեղի են ունենալու քաղաքական ընտրություններ: Այս պարագայում, բնականաբար, կլինեն համապատասխանաբար քաղաքական քննարկումներ, որի մասին դուք կիմանաք»,- ասաց ՄԻնասյանը:
Վերջինս չցանկացավ մեկնաբանել այն տեղեկությունները, որ ՀՀԿ-ն չի առաջադրելու ո՛չ Բալասանյանին, ո՛չ Ղուկասյանին եւ ո՛չ էլ Գրիգորյանին: Մինասյանն ասաց, թե ոչինչ չի բացառվում, բայց այդ հարցը չի ցանկանում մեկնաբանել, որովհետեւ ՏԻՄ ընտրությունների վերաբերյալ քննարկումներ չեն եղել:
Հարցին, թե հնարավո՞ր է Գյումրու քաղաքապետի ընտրություններում ՀՀԿ-ի ցուցակը նա գլխավորի՝ Մինասյանը դարձյալ կրկնեց, որ ոչինչ չի բացառվում:
Հավելենք, որ Գյումրու ՏԻՄ ընտրություններին մասնակցելու մասին կուսակցություններից արդեն իսկ հայտարարել են «Ժառանգություն»-ը եւ «Ալյանս»-ը:
