Փետրվարի 16-ին Բուլղարիայի Ժողովրդական ժողովի նախագահ, տիկին Ցեցկա Ցաչևան ընդունեց Բուլղարիայում ՀՀ դեսպան Արսեն Սհոյանին:
Հանդիպմանը մտքեր փոխանակվեցին հայ-բուլղարական հարաբերությունների ներկա վիճակի, դրանց զարգացման, միջխորհրդարանական հարաբերությունների ամրապնդման վերաբերյալ: Կարևորվեց Բուլղարիայի Ժողովրդական ժողովում Հայաստանի հետ բարեկամության խմբի աշխատանքների և միջխորհրդարանական շփումների, բարձր մակարդակի փոխայցելությունների իրականացումը:
Ցեցկա Ցաչևան ընդգծեց, որ Բուլղարիայի հայ համայնքը ակտիվ մասնակցություն ունի երկրի հասարակական-քաղաքական, սոցիալ-տնտեսական և մշակութային կյանքում:
Դեսպան Սհոյանը ներկայացրեց Հայոց ցեղասպանության 100-րդ տարելիցի կապակցությամբ նախատեսվելիք միջոցառումները: Մտքեր փոխանակվեցին տարածաշրջանային և միջազգային արդի մի շարք հարցերի շուրջ:
