Հայաստանը չի պատրաստվում իր տարածքում օտարերկրյա պետությունների, այդ թվում՝ ռուսական նոր ռազմաբազաներ բացել, բայց պատրաստվում է արդիականացնել Գյումրիում տեղակայված ռուսական բազան: Այս մասին «Интерфакс» գործակալությանը տված հարցազրույցում հայտնել է Հայաստանի Հանրապետության պաշտպանության նախարար Վիգեն Սարգսյանը:
«Այս պահին Հայաստանում այլ երկրների բազաների բացման մասին քննարկումներ չեն տարվում: Մենք չունենք նաև նման դիմում ռուսական կողմից»,- ասել է Վիգեն Սարգսյանը:
Սարգսյանի խոսքով՝ Գյումրիում տեղակայված 102-րդ բազան «մեծ նշանակություն» ունի:
«Մենք ինտենսիվորեն շփվում ենք մեր ռուս գործընկերների հետ դրա արդիականացման, հնարավորությունների ընդլայնման մասին: Կան կոնկրետ թեմաներ, ուղղություններ, որտեղ մեր համատեղ աշխատանքի արդյունքում կարող են հայտնվել համագործակցության նոր ձևեր»,- ասել է նախարարը՝ նշելով, որ խոսքը, մասնավորապես, ՀՕՊ ոլորտում համագործակցության մասին է:
«Ռուսաստանը մեծապես աջակցում է Հայաստանի զինված ուժերի ուժեղացմանը: Այս պահին մենք Ռուսաստանի հետ շատ ծրագրեր ունենք՝ մեր կուրսանտների ուսուցումից մինչև գործողությունների համատեղ պլանավորում»,- հավելել է նախարարը:
