«Տաղարան» համույթը նախաձեռնել է «Մարիա Վոլկոնսկայայի հիշապատումները» («Записки Марии Волконской») կամերային մոնո օպերայի բեմադրումը: Մոնո օպերան եզակի է իր տեսակի մեջ, որովհետև Հայաստանում նման նախադեպ չի եղել: Մոնո օպերայի հեղինակը մշակույթի վաստակավոր գործիչ Էդուարդ Սադոյանն է, իսկ Մարիայի դերում հանդես կգա միջազգային մրցույթների դափնեկիր Էկա Հորստկան:
Այսօր լրագրողների հետ հանդիպման ժամանակ «Տաղարան» համույթի գեղարվեստական ղեկավար և դիրիժոր Սեդրակ Երկանյանը նշեց, որ մոնո օպերայի բեմականացման մտադրություն ունեցել է շատ վաղուց:
«Մոնո օպերայի վրա սկսել եմ աշխատել դեռևս նախորդ տարի աշնանը: Կարող եք հարցնել, ինչո՞ւ հենց Վոլկոնսկայան: Գիտեք, երբ ուսումնասիրում էի հուշապատումները, դրանցում ինձ գրավեց 20-21-ամյա մանկամարդ, երիտասարդ կնոջ զոհողությունը, նրաˋ անձնազոհության գնալու մղումը: Ես հայ պատմությունից էլ գիտեմ դեպքեր, երբ հայ կանայք քաջագործություննրի ու սխրանքների են գնում, բայց Մարիան առանձնացավ նաև իր տարիքի առումով: Նա նվիրվածության այնպիսի աստիճան դրսևորեց, որ թողնելով ամեն ինչˋ ուղևորվեց դեպի անհայտները աքսորված իր ամուսնուն գտնելու»,-նկատեց համույթի գեղարվեստական ղեկավարը:
Լրագրողների կողմից առաջադրված այն հարցին, թե արդյոք տեղին է Ցեղասպանության 100-ամյակին ընդառաջ միջոցառումներում առաջնահերթությունը Վոլկոնսկայայի հուշապատումներին տալ, բանախոսը պատասխանեց. «Եթե ամեն ինչ կապենք 100-ամյակի հետ, ուրեմն ոչ մի այլ բան չպետք է անենք: Կարծում եմˋ սա ճիշտ չէ: Արվեստագետը միշտ գիտի, երբ անդրադառնա իր մեջ հասունացած նյութին: Կարևոր է որպեսզի ամեն ինչ ներսից բխած լինի»:
Մարիայի դերակատար Էկա Հորստկան ընդգծեց, որ իր համար Վոլկոնսկայայի կերպարը դեռևս մինչև վերջ բացահայտված չէ և դժվար էլ թե բացահայտվի: «Սա մեծ պատասխանատվություն է ինձ համար, քանի որ շատերն են գերվել այդ կերպարից, այդ թվում և Պուշկինը: Ես ինքս ինձ հետ երբեմն հակասությունների մեջ եմ ու չգիտեմ ինչպես մեկնաբանել այս կերպարը: Սա տիեզերական կերպար է»,-նկատեց Հորստկան:
Նշենք, որ մոնո օպերայի բեմադրությունը տեղի կունենա մարտի 27-ին, Կամերային երաժշտության տանը:
Վարդուհի Ստեփանյան
