Հայաստանի էներգետիկ համակարգում վթարի պատճառը կարող է Իրանը լինել

ՀՀ տարածքային կառավարման և ենթակառուցվածքների փոխնախարար Հակոբ Վարդանյանը տեսակետ հայտնեց, որ  բլոկների վթարի պատճառը Իրանի էներգահամակարգում տեղի ունեցած տատանումների հետևանքով կարող է առաջացած լինել։

Նա նկատեց, որ կստեղծվի աշխատանքային խումբ. «Պատճառներն ու մեղավորները կբացահայտվեն։ Անհանգստանալու կարիք չկա»,- նկատեց նա։

Վարդանյանի խոսքով՝ այս պահին Լոռու և Տավուշի մարզերի մի մասի էլեկտրականությունը միացված է Վրաստանի էլեկտրահամակարգից։  Նա նկատեց, որ Վրաստանից 28 մեգավատ էներգիա է ներմուծվում, Իրանից՝  42 մեգավատ։

«Այս պահին 583 մեգավատ սպառում վերականգնված է, սպառման պահանջարկը այս ժամերին մաքսիմում 900 մեգավատ է լինում։ Այս պահին  սեփական գեներացիան կազմում է  506 մեգավատ», — ասաց նա։

Փոխնախարարը հավելեց, որ այս պահին Երևան ՋԷԿ-ում և Հրազդանի 5-րդ էներգաբլոկում վերականգնողական աշխատանքներ են տարվում։