Պորտուգալիայի ֆուտբոլի մինչև 19 տարեկանների ազգային թիմի գլխավոր մարզիչ Ֆելիպե Ռամոսի կարծիքով Իսպանիան արժանիորեն դարձավ Եվրոպայի այդ տարիքային խմբի չեմպիոն: Լրագրողների հետ հանդիպման ժամանակ Ռամոսը շնորհավորեց հակառակորդ թիմին հաղթանակի կապակցությամբ: Հաղորդում է armenpress.am-ը։
«Բավականին լավ խաղ ստացվեց և Իսպանիան արժանիորեն հաղթեց Եվրոպայի մինչ 19 տարեկանների առաջնության եզրափակչում»,- ասաց նա:
Ռամոսի խոսքով՝ Իսպանիայի գրոհներն ավելի արդյունավետ ստացվեց և նրանք կարողացան երկու գոլ խփել:
«Հրաշալի մրցաշար անցկացվեց Երևանում»,- եզրափակեց նա:
Երևանում կայացած Եվրոպայի մինչև 19 տարեկանների առաջնության եզրափակչում Իսպանիան Տարոսի դուբլի շնորհիվ հաղթեց գործող չեմպիոն Պորտուգալիային և դարձավ գավաթակիր՝ այդ տիտղոսը նվաճելով ռեկորդային՝ 8-րդ անգամ:
