ՀՀ Կառավարությունն առաջարկում է փոփոխություններ կատարել Եվրասիական տնտեսական միության շրջանակներում, արտաքին առևտրի ոլորտում սահմանափակման ենթակա ապրանքների վերաբերյալ երրորդ երկրներից ներմուծման ու արտահանման համար սահմանել բազային պետական տուրք՝ 1000 դրամին համարժեք: Օրենքի նախագծի շուրջ քննարկումներն այսօր շարունակվեցին ԱԺ-ում:
Պետական տուրքի մասին ՀՀ օրենքում լրացում կատարելու մասին նախագծի քննարկման ժամանակ Էկոնոմիկայի փոխնախարար Էմիլ Տարասյանը՝ պատասխանելով պատգամավորների հարցին, պարզաբանեց, թե որն է օրենքի կարգավորման առարկան:
Տարասյանի խոսքով` օրենքը համալրում է լիցենզիաներ տրամադրելու համար պետական տուրքի պահանջը, որը սահմանված է պետական տուրքի մասին օրենքով:
Ինչ վերաբերում է խոչընդոտներին, որոնք կան ԵՏՄ տարածքում ապրանքաշրջանառության ժամանակ, մասնավորապես՝ ավտոմեքենաների ներկրման հետ կապված, ապա Էմիլ Տարասյանը ասաց, թե նախարարությունը մշտապես կապ ունի գործարարների հետ: Փոխնախարարը շեշտեց, որ հաճախ խոչընդոտներն ունեն սուբյեկտիվ բնույթ:
«Շատ հաճախ չպայմանավորված ԵՏՄ անդամակցությամբ, չիմացությամբ, ինֆորմացիայի պակասի հետևանքով, ներկայացվում են լրացուցիչ պահանջներ, որոնք չեն բխում տվյալ անդամակցությամբ: Նման խնդիրների կարգավորման համար մենք հնչեցնում ենք խնդիրները, օգտագործելով նաև ԵՏՄ հարթակը»,- ասաց Էմիլ Տարասյանը:
