Համահայկական 7-րդ ամառային խաղերի՝ Ստեփանակերտում այսօր կայանալիք բացման հանդիսավոր արարողությունը լավագույնը կլինի խաղերի անցկացման 20-ամյա պատմության մեջ:
Նման համոզմունք է հայտնել Համահայկական խաղերի համաշխարհային կոմիտեի նախագահ Իշխան Զաքարյանը լրագրողների հետ Արցախի Հանրապետության մայրաքաղաքում ունեցած ճեպազրույցի ընթացքում:
«Ավելի քան 5 հազար մարզիկ Համահայկական խաղերի մասնակցության հայտ է ներկայացրել: Մարզական պատվիրակությունների հետ միասին ունենք նաև հյուրեր՝ մարզիկների հարազատները, սփյուռքի տարբեր կազմակերպությունների ներկայացուցիչներ, ովքեր ևս եկել են Արցախ ու մասնակցելու են խաղերի բացման հանդիսավոր արարողությանը»,- ասել է Իշխան Զաքարյանը:
Իսկ ինչով է բացառիկ Համահայկական խաղերի բացման արարողությունը հենց Արցախում անցկացնելը.
«Ես էլ եմ շատ լսել նման արտահայտություն: Ես ինքս երբ խոսում եմ բացառիկ լինելու մասին, նախևառաջ նկատի ունեմ Արցախի հանգամանքը, որովհետև Արցախում այս արարողությունն անցկացնելն ուներ որոշակի բարդություն, չեմ թաքցնում: Կային նաև որոշակի ռիսկեր, բայց հիմա վստահ կարող եմ ասել, որ բոլոր ռիսկերն անցյալում են:
Այս խաղերը լինելու է Համահայկական խաղերի 20-ամյա պատմության լավագույն խաղերից մեկը: Իսկ բացման արարողությունը, կարծում եմ, կարող է լինել նաև լավագույնը»,- իր խոսքում նշել է Իշխան Զաքարյանը՝ չցանկանալով մանրամասներ ներկայացնել այսօր երեկոյան կայանալիք բացման արարողությունից.
«Բացման արարողությունը շատ գեղեցիկ է լինելու: Չեմ կարող շատ մանրամասներ ներկայացնել: Մարզադաշտում և հեռուստատեսությամբ կտեսնեք»,- ասել է Համահայկական խաղերի համաշխարհային կոմիտեի նախագահը:
Մանրամասն՝ armsport.am
