Գյուղից երեք գետ հոսում է Ադրբեջան, բայց Գանձաքարը ջրի խնդիր ունի (տեսանյութ, լուսանկարներ)

Հայաստանում  միգրացիոն քաղաքականության մշակման միջազգային կենտրոնի գրասենյակի աջակցությամբ մի քանի լրատվամիջոցներ երկօրյա այցով Տավուշի մարզի մի քանի համայնքներում ծանոթանալու են գյուղերի միգրացիայի խնդիրներին, գյուղերի զարգացման հեռանկարներին: Առաջին համայնքը  Տավուշի մարզի Գանձաքարն է: Համայնքապետը Վարդգես Դովլաթբեկյանն է, ՀՅԴ-ից: Երկու տարի է, որ  համայնք ղեկավարն է: Միանգամից նկատեցիք, որ որեւէ պաշտոնյայի լուսանկար  պատից կախված չէ: Միայն ամենայն հայոց կաթողիկոս  Գարեգին Բ-ի վաղուցվա լուսանկար եւ ժամը 08:25-ն անհամացրած պատի մի ժամացույց:     Համայնքի բնակչության թիվը 3860 է, որից 180-ը՝ պետական աշխատողներ են: Գյուղն ունի դպրոց, մանկապարտեզ, բուժկենտրոն, եկեղեցի, մշակույթի տուն: Համայնքի բնակիչների  հիմնական զբաղմունքը անասնապահությունն է: Նախորդ կառավարությանը ներկայացրել էին կաթի վերամշակման եւ տոհմային տավարաբուծության զարգացման առաջարկներ: «Ցածր տոկոսադրույքով երկարաժամկետ վարկով ցանկանում ենք տավարաբուծություն զարգացնել, բայց կառավարությունը մերժել է առաջարկը,  քանի որ 50 մլն դրամ  գումար էր անհրաժեշտ:  Սա այն դեպքում, երբ համայնքի բնակչությունը պատրաստակամ է եղել մեկ ցեղական կովի գնի՝2100 դոլարի կեսը վճարել: Այսինքն՝ 25 մլն դրամը պետք է վճարեր համայնքը, մի մասն էլ գյուղացին վարկերով կմարեր: Եթե կաթի վերամշակման արտադրություն լինի, ապա  20-25 աշխատատեղ կստեղծվի»,- ասաց  համայնքի ղեկավարը:

Պրն Դովլաթբեկյանի խոսքով՝ հիմա նորից պատրաստվում են դիմելու նոր կառավարությանը, որից ակնկալիքներն ու սպասումները շատ են:

Գյուղի մյուս խնդիրը ոռոգման եւ խմելու ջրի խնդիրն է: Երեք գետ է հոսում Գանձաքարից դեպի Ադրբեջան, սակայն  գյուղացիները խմելու եւ ոոռգման ջրի խնդիր ունեն: Սրա մասին էլ խոսել գյուղապետի տեղակալ Անաստաս Հակոբյանը: Ավելին՝ նրա խոսքով՝ ջրի խնդրի լուծման համար կառավարությունը 600 մլն դրամ է տրամադրել, սակայն այդպես էլ ծրագիրը կյանքի չի կոչվել: Անաստաս Հակոբյանի խոսքով՝ մինչեւ 2008 թ-ը ստիպել են գյուղապետերին, այդ թվում նաև իրեն, որն այդ ժամանակ եղել է գյուղապետ, որ գյուղում անասնագլխի եւ մյուս ցուցանիշներն ուռճացված  ներկայացնեն: «Այդ պատճառով էլ շատ հարցեր չեն լուծվել: 2008-ից հետո է, որ սկսել են իրական թվեր ու ցուցանիշներ ցույց տալ»,- ասաց գյուղապետի տեղակալը:

Տարեկան 400-500  մարդ գյուղից արտագնա աշխատանքի են գնում: Նրանց մի մասն ընտանիքով է հեռանում գյուղից: Չնայած գյուղի խնդիրներին, ծնելիությունը գրեթե չի նվազել, արտագաղթի տեմպերը շատ չեն: Համայնքի բնակիչները լավատես են, որ նոր կառավարությունը, ի դեմս, Նիկոլ Փաշինյանի, կլուծի իրենց խնդիրները:

Մանրամասները՝ տեսանյութում:

Սոնա Դավթյան