Խորհրդարանում քննարկվում է «Առևտրային արբիտրաժի մասին» Հայաստանի Հանրապետության օրենքում փոփոխություններ և լրացումներ կատարելու մասին հարցը: Հիմնական զեկուցող ՀՀ արդարադատության փոխնախարար Արսեն Մկրտչյանը ներկայացրեց արբիտրաժային դատական համակարգի զարգացմանն ուղղված օրինագծերի փաթեթը: Արսեն Մկրտչյանի խոսքով` ինստիտուտը կայացնելու համար կա փորձի պակաս, և այ պակասը լրացնելու համար նախատեսված են մի շարք միջոցառումներ, որոնք պետք է իրականացվեն:
Ինչպես տեղեկացրեց փոխնախարարը, Հայաստանում գործում են 2 արբիտրաժային դատարաններ՝ Առևտրաարդյունաբերական պալատին կից և Բանկերի միությանը կից:
ԱԺ անկախ պատգամավոր Էդմոն Մարուքյանը հետաքրքրվեց, թե մինչ օրս քանի գործ է քննվել արբիտրաժային դատարաններում և առաջարկվող փոփոխություններով ինչպես է հիմնավորվում, որ կսկսեն գործել արբիտրաժային դատարանները . «Երկար ժամանակ է` արբիտրաժի մասին օրենսդրություն ունենք, քանի՞ գործ է քննվել մինչ օրս, և այս փոփոխությունները կբերե՞ն նրան, որ այդ թիվն ավելանա»:
Պատգամավորի խոսքովˋ անընդհատ այլընտրանքային վեճերի լուծման մեխանիզմներ են մշակվում և ներդրվում դատական համակարգի գերբեռնվածությունը թեթևացնելու նպատակով, բայց ներդրված մեխանիզմները չեն գործում:
Արդարադատության փոխնախարարը չհամաձայնեց պատգամավորի հետ` նշելով, որ արբիտրաժային դատարանները գործում են: Վերջինիս խոսքով` արբիտրաժային դատարանների կողմից գործերը քննվում են և բանկերի միության կողմից տարեկան քննվել է 2 000-3 000 գործ:
Իսկ մշակվող փաթեթն ուղղված է նրան, որ արբիտրաժային դատարաններն ավելի շատ գործեր քննեն. վիճակագրությունն այնքան էլ գոհացուցիչ չէ:
Պատգամավոր Էդմոն Մարուքյանը, սակայն, նշեց` իրեն հետաքրքրում է բանկային ոլորտից տեղյակ է, իրեն այլ ոլորտներում քննվող գործերն են հետաքրքրում:
