Հայաստանում դատական համակարգը շատ վատ վիճակում է գտնվում: Համակարգի թերություններն ընդունում են նաև ՀՀ իշխանությունները, բայց միևնույն ժամանակ շարունակում են անտեսել դատական սխալները: Նման կարծիք այսօր լրագրողների հետ հանդիպմանը հայտնեց Հելսինկյան կոմիտեի նախագահ Ավետիք Իշխանյանը՝ դատական համակարգը որակելով իշխանությունների համար անտեսված ոլորտ:
«Արդեն մի քանի տարի է՝ գլուխ եմ կոտրում և չեմ կարողանում հասկանալ, թե ինչո՞ւ է դատապարտյալների նկատմամբ նման վերաբերմունք դրսևորվում: Քաղաքակիրթ մարդկությունը հասել է մահապատժի վերացմանը, մինչդեռ, երբ դատական համակարգը չի դնում ցմահ ազատազրկման վերանայման խնդիրը սա հավասար է մահապատժի, որովհետև մարդու համար այլևս ոչ մի հույս չի մնում»,- ասաց Իշխանյանը:
Անդրադառալով նոր ի հայտ եկած հանգամանքներին՝ բանախոսը նշեց, որ դրանք ևս հաճախ անտեսվում են: Որպես օրինակ նա առանձնացրեց Արթուր Մկրտչյանի գործը, ով մեղադրվում է 5 զինվորի սպանության մեջ: Բանախոսը մասնավորապես անդրադարձավ վերջերս իր հարցազրույցներից մեկի ժամանակ Գագիկ Ջհանգիրյանի, ով դեպքի կատարման ժամանակ ՀՀ զինվորական դատախազ էր, այն հայտարարությանը, որ, հավանաբար, Մկրտչյանը չի սպանել 5 զինվորիներին, բայց անկասկած սպանել է նրանցից 3-ին:
«Այսպիսի և մի շարք այլ հարցեր, որոնք շատ կարևոր են գործի եզրակացության համար, տեղ չեն գտել դատական գործում: Սա արդեն իսկ պատճառ է վերաքննիչ դատարան դիմելու»,-ընդգծեց Իշխանյանը՝ հավելելով, որ դատարանն, այնուամենայնիվ, չի ցանկանում վերանայել այս գործը:
Վարդուհի Ստեփանյան
