Աշխարհահռչակ ֆրանսահայ շանսոնյե Շառլ Ազնավուրը հարցազրույց է տվել CNN հեռուստաընկերությանը, որտեղ նաև անդրադարձել է հայկական թեմաների: Մասնավորապես, լրագրողի հարցին, թե ինչ նշանակություն ունի Ազնավուրի համար հայ լինելը, երգիչը պատասխանել է.
«Ֆրանսիացի լինելն ինձ համար շատ ավելի կարևոր է, քան հայ լինելը, սակայն ես հայ եմ և ես դա չեմ թաքցնելու: Դա ահավոր կլինի: Չեմ սիրում մարդկանց, ովքեր ինչ-որ բան թաքցնում են, քանի որ սարսափում են որևէ տեղ չընդունվելուց: Չեք սիրում հայերի՞ն. ես գնում եմ, հաջողություն»,- ասել է Ազնավուրը:
Շանսոնյեն նաև անդրադարձել է Հայոց ցեղասպանությանը. նշելով, որ, թեև մեծ կարևորություն չի տալիս Թուրքիայի կողմից «ցեղասպանություն» բառի կիրառմանը, սակայն իր համար շատ կարևոր է, որպեսզի Թուրքիան ճանաչի պատմական իրողությունը:
