ՀՀ տարածքային կառավարման և զարգացման նախարար Դավիթ Լոքյանը նախօրեին աշխատանքային այցով Տավուշում էր: Այցի ընթացքում նախարարին ուղեկցել են Տավուշի մարզպետ Հովիկ Աբովյանը և ՄԱԿ-ի Զարգացման ծրագրի (ՄԱԶԾ) «Ինտեգրված աջակցություն գյուղական համայնքների զարգացմանը. համայնքների դիմակայունության ամրապնդում» ծրագրի ղեկավար Արմեն Տիրատուրյանը, տեղեկացնում է նախարարության մամուլի ծառայությունը:
Նախարարն այցելել է մարզի մի շարք սահմանամերձ համայնքներ, մասնավորապես` Բաղանիս, Ջուջևան, Բերդավան, Դովեղ, հանդիպել համայնքի բնակիչների հետ, զրուցել խնդիրների շուրջ:
Համայնքապետերի հետ ունեցած հանդիպումների ժամանակ նախարար Դավիթ Լոքյանը հետաքրքրվել է, թե կոնկրետ ինչ ծրագրերի անհրաժեշտություն կա տվյալ համայնքում իրականացնելու` ելնելով տվյալ համայնքի կարիքներից:
Քննարկվել են նաև ՄԱԶԾ «Ինտեգրված աջակցություն գյուղական համայնքների զարգացմանը. համայնքների դիմակայունության ամրապնդում» ծրագրի շրջանակներում իրականացվող և իրականացվելիք համայնքային ծրագրերին վերաբերող հարցեր:
ՌԴ կառավարության կողմից ֆինանսավորվող վերոնշյալ ծրագիրն իրականացվում է ՄԱԶԾ հայաստանյան գրասենյակի կողմից` ՀՀ տարածքային կառավարման և զարգացման նախարարության հետ սերտ համագործակցությամբ:
Ծրագրի շրջանակներում Տավուշի մարզի քառասունհինգ սահմանամերձ համայնքների բնակիչներ հնարավորություն կունենան մշակելու իրենց համայնքային ծրագրերը՝ թիրախավորելով ֆինանսավորման համար այնպիսի ոլորտներ, ինչպիսիք են ենթակառուցվածքների վերականգնումը և եկամուտ ստեղծող ծրագրերը:
«Մենք փորձելու ենք տարածքների տնտեսական զարգացման մոտեցումները գյուղ առ գյուղ զարգացնել և այդ ուղղությամբ տանել առաջիկա ներդրումային քաղաքականությունը»,-նշել է իր խոսքում նախարար Դավիթ Լոքյանը:
Այնուհետև նախարարն ուղևորվել է Նոյեմբերյան, որտեղ Տավուշի մարզպետ Հովիկ Աբովյանի, Նոյեմբերյանի տարածաշրջանի համայնքապետերի և ոլորտի այլ պատասխանատուների հետ անցկացրել է խորհրդակցություն` համայնքներում աղքատության հաղթահարման ուղիների վերաբերյալ հարցերը քննարկելու նպատակով:
Ներկաներին ուղղված իր խոսքում Դավիթ Լոքյանը Նոյեմբերյանի տարածաշրջանի համայնքների հիմնական խնդիրներից է համարել համայնքի բնակիչների կողմից եկամտաբեր տնտեսություն վարելը: Նախարարը նշել է, որ շուտով ՀՀ կառավարությունը կընդունի «Հայաստանի 2016-2025թթ. տարածքային զարգացման ռազմավարություն» փաստաթուղթը, որն ամբողջությամբ նվիրված է լինելու վերոնշյալ գաղափարին, այն է` համայնքների տնտեսական ներուժի բացահայտում և այդ ուղղությամբ ներդրումային քաղաքականության իրականացում:
«Ես տպավորված եմ, որ մարզպետը ինձանից շատ այս խնդրի ջատագովն է, և մենք այստեղ չհաջողելու խնդիր չունենք, եթե դուք նույնպես միանաք մեր այս ընդհանուր գաղափարին: Սա դառնում է պետության հիմնական առանցքային ուղղություններից մեկը` տարածքները հավասարաչափ զարգացնելու և ՀՆԱ-ն մեծացնելու գործում»,-ասել է Դավիթ Լոքյանը խորհրդակցության ավարտին:
Տավուշի մարզ աշխատանքային այցի շրջանակներում ՀՀ տարածքային կառավարման և զարգացման նախարար Դավիթ Լոքյանի վերջին կանգառը Դիլիջան համայնքն էր: Համայնքների խոշորացման ծրագրի շրջանակներում ներկայիս Դիլիջան համայնքը կազմավորվել է նախկին Դիլիջան, Հաղարծին, Թեղուտ, Գոշ, Աղավնավանք, Խաչարձան և Հովք համայնքների միավորումից:
Դիմելով խորհրդակցությանը ներկա համայնքապետերին, նախարարը նշել է, որ այցելության հիմքում դրվել էր հիմնական քննարկումն անցկացնել հատկապես Դիլիջանում՝ խոշորացման գործընթացից հետո համայնքներում առկա խնդիրները, հետագա ծրագրերը տեղում քննարկելու նպատակով: Նա շնորհակալություն է հայտնել համայնքապետերին՝ խոշորացման գործընթացն արդյունավետ անցկացնելու համար:
«Կարծում եմ, որ կառավարման այս ձևը կնպաստի ձեր համայնքների ընդհանուր բարգավաճմանը»,-ասել է Դավիթ Լոքյանը, ընդգծելով, որ այս գործընթացը շարունակական է լինելու, իրականացվելու է ողջ հանրապետության տարածքում: Նախարարն ընդգծել է, որ Դիլիջանի խոշորացման ծրագիրը կարող է օրինակելի լինել մյուս համայնքների համար:
Խորհրդակցության ժամանակ քննարկվել են խոշորացված համայնքներում ԱՄՆ Միջազգային զարգացման գործակալության (USAID) կողմից նախատեսվող տնտեսական զարգացման ծրագրերին վերաբերող հարցեր:
«Մեր խնդիրը պետք է դառնա այդ ամբողջը համահունչ դարձնել պետության կողմից որդեգրած տարածքների տնտեսական զարգացման ռազմավարությանը, որով փորձելու ենք ակտիվացնել համայնքներում տնտեսական քայլերը»,-ասել է նախարարը՝ առաջարկելով համայնքապետերին արդյունավետ ծրագրեր ներկայացնել: Նախարարը հավաստիացրել է, որ ծրագրերի կազմման և իրականացման գործում ՏԿԶ նախարարությունը պատրաստ է աջակցել համայնքներին:
