Ծխախոտի ծխի բաղադրությունը
Զարմանալի է, սակայն փոքրիկ գլանակի մեջ 4000 տեսակի միացություն կա, որոնցից 40-ն առանձնապես վտանգավոր են համարվում, քանի որ քաղցկեղածին են ու մի քանի հարյուրի հասնող թույներ են պարունակում.նիկոտին, բենզապիրեն, ցիանիդ, մկնդեղ, Ֆորմալդեհիդ, ռադիոակտիվ նյութեր`պոլոնիում, արճիճ, վիսմուտ:
Հաճախ խուսափում ենք անգամ անհրաժեշտության դեպքում ռենտգենային ճառագայթման ենթարկվելուց, սակայն օրական մեկ տուփծխախոտը շուրջ 500 ռենտգենային ճառագայթի է հավասար: Ծուխը ներքաշելուց հետո նիկոտինն ուղեղին է հասնում 7 վրկ-ից: Այրվող ծխախոտը 700-900 աստիճան տաքություն ունի: Ստաժավոր ծխողի թոքերը սև ու փտող զանգվածի է նմանվում: Նիկոտինն առաջացնում է անոթների սպազմ, ինչից էլ խախտվում է հյուսվածքների թթվածնային սնուցումը: Մանր անոթների սպազմի հետևանքով մաշկը թոշնում է: Ծխելու թերևս առաջին ու ամենատհաճ հետևանքը բերանի վատ հոտն է , դեղնող ատամները, կոկորդի բորբոքումը, ծխից կարմրող աչքերը: Նիկոտինը ողջ աշխարհում թմրանյութերի շարքն է դասվում ու դրանից, ինչպես և հերոինից ու մյուս թմրամիջոցներից աստիճանաբար կախվածություն է առաջանում` աննկատ ու տևական ընթացքով:
Ծխելու հետևանքով 3 հիմնական հիվանդություններ են զարգանում` թոքերի քաղցկեղ, քրոնիկ բրոնխիտ ու սիրտանոթային հիվանդություններ: Հայտնի է որ թոքերի քաղցկեղի բոլոր դեպքերի 90%-ի, բրոնխիտի` 75%, սրտի հիվանդությունների 25%-ի պատճառը ծխելն է:
Չկա մի օրգան, որ չտուժի ծխախոտից.երիկամներ, միզապարկ, սեռական գեղձեր ու արյունատար անոթներ, գլխուղեղ ու լյարդ:
Եթե հասուն մարդն անընդմեջ մեկ տուփ ծխախոտ ծխի, ապա հետևանքները ողբալի կլինեն, նույնատիպ ազդեցություն դեռահասների մոտ կես տուփից է առաջանում:
Ծխելը վնասում է սիրտը. ծխողի մոտ սրտի կծկումների հաճախությունն օրական 15000 զարկով ավելի է, քան չծխողներինը, էականորեն տուժում է հյուսվածքներին թթվածնի մատակարարման մակարդակը, դրան հավելած շմոլ գազը, որը կպչում է հեմոգլոբինին ու թույլ չի տալիս, որ էրիթրոցիտները թթվածին փոխադրեն: Դրանով է բացատրվում, որ ծխող դպրոցականները հետ են մնում դասընկերներից:
Երբ ծուխը ներշնչելուց հետո արտաշնչեք սպիտակ կտորի վրա, ապա կտեսնեք շագանակագույն հետք.դա հենց թութունի խեժն է: Պատկերացրեք, թե ինչ է գնում թոքեր ծխելու ժամանակ: Եթե ճագարի ականջը մի քանի անգամ տրորեք ծխախոտի ձյութով, ապա կենդանու մոտ ուռուցք կգոյանա:
Իսկ երբ կինն է ծխում…
Դա հատկապես վտանգավոր է, քանի որ առաջին իսկ քուլան ներս շնչելով, կոկորդը սկսում է քերվել, ավելանում է սրտի կծկումների հաճախությունը, տհաճ համ է բերանում առաջանում, հազ, գլխապտույտ, սրտխառնուք ու նույնիսկ, չի բացառվում` փսխում լինի: Բոլոր թվարկված հետևանքները օրգանիզմի պաշտպանական ռեակցիաներն են: Իսկ երբ ծխողը փորձում է ճնշել այդ ռեակցիաները, ապա յուրաքանչյուր գլանակի հետ թունավորման նոր չափաբաժին է ստանում ու հետզհետե, կախվածությունն ուժգնանում է:
Երիտասարդ աղջիկը չի կարող չնկատել, որ առավոտյան, քնից արթնանալուց հետո հազ է առաջանում, ձայնը խռպոտում, բերանից տհաճ հոտ է գալիս, մաշկն է թոշնում, ատամները դեղնում ու ընդհանրապես, նա իր տարիքից շատ ավելի մեծ է երևում: Որքան նա փորձի նվազեցնել նիկոտինային կախվածությունը բարակ, “կանացի” ծխախոտի անցնելով, միևնույն է, վիճակը չի թեթևանում, քանի որ ավելի շատ է ծխում` այդ “պակասը” լրացնելու նպատակով:
Շատերն էլ սթրեսի դեմ պայքարում են ծխախոտով: Դրա հետևանքով բորբոքային հիվանդություններ են առաջանում, եղածն էլ սրվում է ու հանգեցնում օրինակ` անպտղության:
Գերմանացի գիտնական գինեկոլոգ Բերնհարդը ավելի քան 6000 կնոջ է հետազոտել ու պարզել , որ եթե չծխող կանանց 4%-ն անպտղությունից է տառապում, ապա ծխողների միայն 42%-ը:
Վիժման բոլոր դեպքերի 96%-ը ծխախոտի հետևանքով է կատարվում ու բոլոր թերհաս երեխաների` 1/3-կրկին ծխելու հետևանք են:
Ծուխը վտանգավոր է ինչպես ծխողի, այնպես էլ նրա կողքին գտնվող չծխողների համար: Ծխող կանայք ավելի շուտ են ծերանում, քան չծխողները, նրանց մոտ սեռական ծերացումը նույնպես շուտ է կատարվում:
