Նիդերլանդների գիտնականներն ի մի են բերել մի քանի ամենօրյա գործողությունների ու արարքների տեսակներ, որոնք կարող են հանգեցնել սիրտ-անոթային համակարգի հիվանդությունների:
Կաթվածը կամ էլ ուղեղում արյունազեղումը մահացության գլխավոր պատճառներից մեկն է: Այդ հիվանդությունը շատ նենգ է, քանի որ նախապես իր մասին ոչ մի կերպ չի հուշում: Գիտությունը որոշել է կաթվածի զարգացման ռիսկերը` սովորական ճնշումից մինչև արյան մեջ թանձրուկների գոյացումը: Սակայն հարվածի պահը ոչ ոք չի կարող գուշակել:
Հաճախ կաթվածը եթե չի էլ սպանում, ապա իր զոհին կաթվածահար է անում, անդամալուծում, լրիվ կամ էլ մասնակի, կամ կարող է անցնել ինչպես օրինակ հոլիվուդյան աստղ Շարոն Սթոունի դեպքում եղավ:
Առողջ կենսակերպը չափազանց կարևոր է, չծխելը, ալկոհոլով չտարվելը, սննդակարգն ու քաշը կարգավորելը, ինչպես նաև օրական առնվազն 7-ժամյա քունը նվազեցնում են սրտի հիվանդությունների զարգացման հավանականությունը:
Սակայն քչերը գիտեն կաթվածի մյուս ռիսկերի մասին, որոնք էլ հենց հոլանդացի գիտնականները հավաքագրել են:
Այսպես ուրեմն, նրանք ասում են որ սուրճի գործածումը մեծացնում է կաթվածի հավանականությունը 10,5%-ով: Ուրեմն, եթե առանց այդ էլ արյան բարձր ճնշումից տառապում եք, ապա բացառեք այդ ըմպելիքը օրաբաժնից:
Հաջորդը կոլան է, որը ևս մեծացնում է կաթվածի հավանականությունը 3,5%-ով: Ֆիզիկական չափազանց ծանրաբեռնվածությունը ևս կաթվածի վտանգներից է համարվում ու այդ ռիսկը մեծացնում 8%-ով: Տարօրինակ է, սակայն քթանցքերը թաշկինակով մաքրելը կամ անգամ փռշտալը մեծացնում է այդ ռիսկը 5,5%-ով: Պարզվում է, վտանգավոր է նաև զուգարան գնալն անընդհատ հետաձգելը, դա հիշյալ վտանգը մեծացնում է 2,5%-ով: Եվ վերջապես, զայրույթը ևս վտանգի սահմանին է մոտեցնում 1,5%-ով:
Ուրեմն, խնայենք մեզ, հետևենք ու փորձենք չափը չգերազանցել և ոչ մի բանում:
