AraratNews-ի տեղեկություններով՝ մոտ օրերս պատգամավորական իրենց մանդատներից կարող են զրկվել ԲՀԿ-ական միանգամից 5 պատգամավոր՝ կուսակցության ղեկավար Գագիկ Ծառուկյանը, Կարո Կարապետյանը (Յուվեցի Կարո), Ռուբեն Գևորգյանը (Ծաղիկ Ռուբո), Ծառուկյանի խնամին՝ Մուրադ Գուլոյանը և Ռուստամ Գասպարյանը:
Նշենք, որ վերջիններս Աժ նախորդ՝ աշնանային նստաշրջանի՝ սեպտեմբերի 8-ից դեկտեմբերի 4-ի ընթացքում ամենաշատ բացականեր ունեցողների թվում են: Ծառուկյանը 55 անգամ չի մասնակցել օրենսդիրի նիստերին, Գուլոյանը՝ 41, Կարապետյանը՝ 33, իսկ Գևորգյանը՝ 31:
Հիշեցնենք, որ ՀՀԿ խորհրդի փետրվարի 12-ի նիստում ՀՀ նախագահ Սերժ Սարգսյանն անդրադարձել էր ԲՀԿ ղեկավարի բացակայություններին՝ նշելով. «Մեր պատգամավորները վաղվանից կնախաձեռնեն նման անհեթեթ վիճակին վերջ տալու համար անհրաժեշտ քայլերը»:
Սպասվում է, որ ՀՀ ԱԺ նախագահ Գալուստ Սահակյանը առաջիկա օրերին համապատասխան նախաձեռնությամբ հանդես կգա:
