«Ոտքի Հայաստան» նախաձեռնության անդամները Հանրապետության հրապարակում հանրահավաք են հրավիրել` պահանջելով չեղարկել էլեկտրաէներգիան 6,93 դրամով թանկացնելու որոշումը:
Նախաձեռնության անդամներն իրենց հետ Հանրապետության հրապարակ էին բերել անվադողեր, ինչին ի պատասխա ն Ոստիկանությունը կոչ արեց հեռացնել դրանք հրապարակից:
Երևանի փոխոստիկանապետ Վալերի Օսիպյանի խոսքով` իրենք տեղեկություններ ունեին, որ անվադողերը բերվել են հրապարակ այրելու համար: Միաժամանակ, Օսիպյանն ասաց, որ հանրահավաքի մասին իրազեկման մեջ անվադողեր օգտագործելու մասին տեղեկատվություն չի եղել: Իրենց հերթին, նախաձեռնության անդամները նշեցին, որ անվանդողերը պետք է օգտագործվեին որպես հարթակ:
Այնուհետև սայավամարդ հանրահավաքի մասնակիցների և ոստիկանության միջև առաջացավ որոշակի լարվածություն: Ոստիկանները պահանջեցին անհապաղ հեռացնել անցվադողերը, սակայն նախաձեռնության անդամները հրաժարվեցին:
Ոստիկանի օրինական պահանջին չենթարկվելու համար նախաձեռնության մի քանի անդամներ բերման ենթարկվեցին ոստիկանների կողմից: Սակայն դրանից որոշակի ժամանակ անց ազատ արձակվեց նախաձեռնության անդամ Անդրիաս Ղուկասյանը, ով կրկին գտնվում է Հանրապետության հրապարակում: Վալերի Օսիպյանը խոստացել է, որ շուտով մյուս բերման ենթարկվածները նույնպես ազատ կարձակվեն:
