Apple ընկերությունն այսօր Սան Ֆրանցիսկոյում կիրականացնի նոր արտադրանքի շնորհանդես։ Թեպետ նախօրոք չի հաղորդվել, թե ինչ արտադրանքի մասին է խոսքը, բայց գործարար շրջանակներում չեն կասկածում, որ խոսքը վերաբերում է «խելացի ժամացույցին»՝ Apple Watch-ին։
Միջոցառումը տեղի է ունենալու «Յերբա Բուենա» արվեստի կենտրոնում։ Բոլոր մասնակիցները հատուկ հրավեր են ստացել ընկերության ղեկավարությունից։ Շնորհանդեսն իրականացնելու է Թիմ Քուքը, ով ղեկավարում է Apple-ը։ Այն հեռարձակվելու է համացանցում՝ ուղիղ եթերում։
«Խելացի ժամացույցը» Քուքի գլխավոր նախագիծն է այս պաշտոնում։
