Սերժ Սարգսյանի հրամանագրով իր վերահսկողական ծառայության պետ Հովհաննես Հովսեփյանը նշանակվեց ՊԵԿ նախագահ: Հովսեփյանը բացի Բաղրամյան 26-ում աշխատելիս, Սահմանադրական փոփոխությունների ժամանակ «Այո»-ի շտաբի փոխնախագահն էր: ՊԵԿ նախագահի պաշտոնում նշանակվելուց հետո մամուլում հայտնվեց Հովսեփյանի հայտարարագիրը, որն ուսումնասիրելուց պարզ է դառնում, որ նրան այնքան շատ են «սիրում», որ յուրաքանչյուր տարի հազարավոր դոլարներ են նվիրաբերում: Իհարկե, նվիրաբերողները իրենց «սերը» թաքուն են պահել, եւ հայտնի չէ, թե ով, կամ ովքեր են հազարավոր դոլարները նվիրել ՊԵԿ «նորաթուխ» նախագահին:
Տնտեսական մեկնաբան Հայկ Գեւորգյանն, անդրադառնալով Հովհաննես Հովսեփյանի՝ ՊԵԿ նախագահի պաշտոնում նշանակվելուն, Araratnews.am-ի հետ զրույցում նշեց, որ, ըստ էության, Սերժ Սարգսյանն իր հավատարիմ մարդկանցով է լցնում կառավարությունը: «ՊԵԿ ամբողջ ոլորտը Սերժ Սարգսյանի լիակատար վերահսկողության տակ պետք է լինի միշտ, որովհետեւ ՊԵԿ-ը ապահովում է ոչ միայն պետական լեգալ բյուջեն, այլ նաեւ, իշխանությունների, այսպես կոչված, սեւ դրամարկղը , եւ այդ իմաստով ՊԵԿ-ի նախագահ պետք է լինի Սերժ Սարգսյանի ամենավստահելի անձանցից մեկը։ Տվյալ դեպքում Հովհաննես Հովսեփյանը համապատասխանում է այդ չափանիշներին»,- ասաց Հայկ Գեւորգյանը: Դիտարկմանը, թե արդյոք Գագիկ Խաչատրյանը չէ՞ր համապատասխանում այդ չափանիշներին, եւ կամ Սերժ Սարգսյանի վստահելի անձանցից չէ՞ր, Հայկ Գեւորգյանն ասաց, թե առայժմ դժվար է ասել՝ ինչ է տեղի ունեցել, որն էր Գագիկ Խաչատրյանին հանելու պատճառը: «Կարծում եմ ժամանակի ընթացքում, ինչ-որ արտահոսքեր կլինեն լրատվականներում, եւ կհասկանանք, թե ինչն է եղել պատճառը»,- ասաց տնտեսական մեկնաբանը:
Հարցին, թե կան տեսակետներ, որ Սերժ Սարգսյանը պարզապես պարգեւատրում է «Այո»-ի շտաբի գլխավոր դերակատարներին, Հայկ Գեւորգյանը նշեց, թե «Այո»-ի շտաբում եւս Սերժ Սարգսյանը ներգրավել էր իրեն հավատարիմ մարդկանց: Ըստ Գեւորգյանի՝ հիմա, պարզապես, այդ թիմը տեղափոխվում է կառավարություն:
Անդրադառնալով Հովհանես Հովսեփյանի հայտարարագրին, տնտեսական մեկնաբաննն, ասաց, որ ինքը պարբերաբար ուսումնասիրում է բարձրաստիճան պաշտոնատար անձանց հայտարարագրերը, եւ իրեն չի հանդիպել որեւէ մեկը, ով այդչափ նվիրատվություն ստացած լինի ինչ-որ մեկից: «Չեմ կարողանում հասկանալ, ոնց կարելի է 4.5 միլիարդ նվիրատվություն տալ մարդուն, որը զբաղցնում է նման ազդեցիկ պաշտոն, ինչի համար են տալիս»:
Նշենք, որ Էներգետիկայի եւ բնական պաշարների նախարար նշանակված Լեւոն Յոլյանը եւս «Այո»-ի շտաբի փոխնախագահն էր:
