Սերժ Սարգսյանը վերջերս հայտարարեց, որ Մեծամորի հայկական ատոմակայանի շահագործումը երկարաձգվելու է մինչեւ 2027 թվականը, որից հետո կներդրվեն նոր միջուկային բլոկներ: Սակայն Հայաստան-ԵՄ համաձայնագրում կա դրույթ, ըստ որի՝ Մեծամորի ատոմակայանը պետք է փակվի :
«Հայաստանի հելիոֆիկացիայի ծրագրի» հեղինակ, տեխնիկական գիտությունների դոկտոր Վահան Համազասպյանն այսօր լրագրողների հետ զրույցում խոսեց Հայաստան-ԵՄ համաձայնագրի մասին: Նրա խոսքով՝ ասոցացման համաձայնագիրը Սերժ Սարգսյանի մեծ հաջողությունն է:
Հայաստան-ԵՄ համաձայնագրում կան մտահոգիչ դրույթներ, որոնցից մեկը ատոմակայանի մասին է: Վահան Համազասպյանի խոսքով՝ հիմա ատոմակայանի մեկ էներգաբլոկն է աշխատում: «Շահագործումն էլ երկարացվել է տասը տարով: Այս կոռումպացված ժամանակաշրջանում հույսը դնել ՄԱԳԱՏԷ-ի մասնագետների վրա, որոնք հավաստիացրել են, թե ատոմակայանի շահագործումը կարելի է տասը տարով երկարացնել, չի կարելի: Փողով ատոմակայանի կյանքը չեն երկարացնում: Ատոմակայանը կարող է հարյուր տարի աշխատել, բայց որքան երկար աշխատի ատոմակայանը, այնքան կնվազի նրա անվտանգ լինելը»,- ասաց «Հայաստանի հելիոֆիկացիայի ծրագրի» հեղինակը:
Գիտնականի խոսքով՝ Սերժ Սարգսյանը խոսում է երկրի էներգետիկ անվտանգության մասին, բայց կարևոր է նաև ֆիզիկական անվտանգությունը: «Ատոմակայանն այն տեղը չէ, որտեղ կարելի է փող աշխատել»,- ասաց գիտնականը:
Araratnews.am-ի հարցին՝ առանց ատոմակայանի Հայաստանը կարո՞ղ է ունենալ զարգացած տնտեսություն, Վահան Համազասպյանն ասաց. «Այո՛, եւ հզոր տնտեսություն կարող ենք ունենալ նաև նոր ատոմակայան ունենալով»:
Մանրամասները՝ տեսանյութում:
Սոնա Դավթյան
