Երևանի Մոսկովյան փողոցում գտնվող «Արտաշի մոտ» ռեստորանում երեկ գիշեր դանակահարված գանձապահը 24 -ամյա Գարեգին Սաթումյանն է: Նրան տեղափոխել են Երևանի թիվ մեկ համալսարանական հիվանդանոց, որտեղից Araratnews.am-ին փոխանցեցին, որ Գարեգին Սաթումյանն իրենց մոտ տեղափոխվել է որովայնի, պարանոցի, կրծքային, սրունքի հատվածում ծակած-կտրած վերքերով: Գարեգինին վիրահատել են: Նա այժմ գտնվում է վերակենդանացման բաժանմունքում: Նրա վիճակը գնահատվում է կայուն ծանր:
«Արտաշի մոտ» ռեստորանից էլ մեզ փոխանցեցին, որ մանրամասների չեն տիրապետում և տեղյակ չեն, թե ինչ է տեղի ունեցել: Ինչ վերաբերում է հարցին, թե ռեստորանում տեղադրվա՞ծ է, արդյոք, տեսախցիկ, որը ֆիքսել է կատարվածը, աշխատակիցներից մեկը հայտնեց, որ այդ տեղեկատվությանը ևս չի տիրապետում:
Նշենք, որ Հայաստանի քննչական կոմիտեի Երևանի քննչական վարչության Կենտրոնական քննչական բաժնում հարուցվել է քրեական գործ՝ ՀՀ քր.օր-ի 34-104 հոդվածի (սպանության փորձ) հատկանիշներով:
