Ազատ ոճի ըմբշամարտի Հայաստանի հավաքականի գլխավոր մարզիչ Արայիկ Բաղդադյանը ներկայացրել է թիմի կազմը Սերբիայում կայանալիք վարկանիշային մրցաշարում։ Ապրիլի 13-17-ը կայանալիք մրցաշարին հայկական թիմը կներկայանա 5 ըմբիշով՝ Գառնիկ Մնացականյան (57 կգ), Դավիթ Սաֆարյան (65 կգ), Սուրեն Խաչատրյան (74 կգ), Մուսա Մուրթազալիեւ (86 կգ), Էդգար Ենոքյան (97 կգ):Արայիկ Բաղդադյանը NEWS.am Sport-ի թղթակցի հետ զրույցում պատմեց նոր մեկնարկած հավաքի մասին․
«Հայաստանի հավաքականների կենտրոնում այօրվանից մեկնարկում ենք Սերբիայում կայանալիք օլիմպիական վարկանիշային մրցաշարից առաջ վերջին հավաքը, որը կտեւի մինչեւ ապրիլի 12-ը: Սերբիայից անմիջապես հետո ապրիլի 20-24-ը Մոնղոլիայում տեղի կունենա մեր երկրորդ վարկանիշային մրցաշարը: 99 տոկոսով, այն մարզիկները, ովքեր կմասնակցեն Սերբիայի մրցաշարին, հանդես չեն գա Մոնղոլիայում: Մեր վերջին հնարավորությունը մայիսի 6-8-ը Թուրքիայի Ստամբուլ քաղաքում կայանալիք մրցաշարն է: Բոլոր մրցաշարերից առաջ Երեւանում կանցկացնենք հավաքներ: Նույնիսկ մրցաշարերի օրերին թիմի մյուս անդամները հանգիստ չեն ունենա, եւ հավաքականի երկրորդ մարզիչ Հովսեփ Հովսեփյանի ղեկավարությամբ Երեւանում կշարունակվեն մարզումները, որպեսզի պատրաստ լինեն Մոնղոլիայի եւ Թուրքիայի մրցաշարերին: Շատ կցանկանայի, որ վերջին վարկանիշային մրցաշարին չհասնեինք։ Թիմի վիճակից ելնելով ու ամեն ինչ գիտակցելով՝ 3-4 օլիմպիական ուղեգրի ակնկալիք ունեմ: Եթե 3-4 վարկանիշ նվաճենք, դա կհամարեմ մեծ արդյունք»,- ասաց Արայիկ Բաղդադյանը:
