Մեծի Տանն Կիլիկիո կաթողիկոս Արամ 1-ինը շաբաթ օրը ընդունելության է արժանացել Իրանի խորհրդարանի նախագահ Ալի Լարիջանիի կողմից։ Ինչպես տեղեկացնում է իրանական Mehr գործակալությունը, Արամ Առաջինը շնորհակալություն է հայտնել Իրանին հայկական համայնքին աջակցելու համար և ասել, որ Իրանի հայերն ունեն լուրջ ազատություններ և սերտ հարաբերութոյւններ են պահպանում Իրանի մուսուլմանական մեծամասնության հետ։
Կողմերը նաև քննարկել են տարածաշրջանում ահաբեկչության կործանարար դերը և մտահոգություն հայտնել ծավալվող իրադարձությունների վերաբերյալ։ Լարիջանին հատուկ շեշտել է Իրանի հայ համայնքի դերը այդ երկրի կյանքում Իսլամական հեղափոխությունից ի վեր, հատկապես՝ իրանաիրաքյան պատերազմի ժամանակ։
Ըստ Լարիջանիի՝ այն ծայրահեղական խմբավորումները, որոնք ստանում են մեծ տերությունների աջակցությունը, վտանգ են ներկայացնում ոչ միայն տեղի քրիստոնյա, այլ նաև մուսուլման բնակչության համար։
