Առաջիկա ցրտերին ընդառաջ Երեւանի քաղաքապետարանը խոստանում է աշխատել արտակարգ ռեժիմով:
Այս առնչությամբ քաղաքապետարանի տարածած հաղորդագրության մեջ ասվում է.
«Հայպետհիդրոմետ» ծառայության տվյալների համաձայն, այսօր, հունվարի 23-ի երեկոյան ժամերից Երեւանում սպասվում են ձյան տեսքով տեղումներ, որոնք կշարունակվեն մինչեւ հունվարի 26-ի ցերեկը: Առաջիկա օրերին սպասվում է նաեւ ջերմաստիճանի կտրուկ նվազում մինչեւ -17 աստիճանի: Հաշվի առնելով այս հանգամանքը, Երեւանի քաղաքապետարանի համապատասխան բոլոր ծառայությունները կաշխատեն արտակարգ ռեժիմով՝ փորձելով առավելագույնս մեղմել տեղումներով պայմանավորված քաղաքացիներին պատճառվող հնարավոր անհարմարությունները։
Հարկ է նշել, որ թե՛ ձնամաքրման, թե՛ ճանապարհների երթեւեկելի հատվածներն աղի եւ ավազի խառնուրդով մշակման աշխատանքները կիրականցվեն համաձայն նախապես հաստատված ընթացակարգի։
Այնուհանդերձ, երթեւեկի հնարավոր դժվարություններից զերծ մնալու նպատակով, հորդորում ենք մեր քաղաքացիներին լինել ավելի զգոն եւ ուշադիր, պահպանելով ձմեռային երթեւեկության բոլոր կանոնները։
Կոչ ենք անում նաեւ առաջացող հարցերի եւ խնդիրների մասին տեղեկացնել Երեւանի քաղաքապետարանի «Թեժ գիծ» հեռախոսահամարների /514-152, 514-187, 514-236, 1-08/ կամ վարչական շրջանների ֆեյսբուքյան էջերի միջոցով:
Եղանակային փոփոխությունների արդյունքում հնարավոր անհարմարությունների լուծման հարցում ակնկալում ենք մեր համաքաղաքացիների օժանդակությունն ու ըմբռնումով մոտեցումը։
