Երևանում վերելակների անսարքությունների պատճառով տեղի ունեցող մահվան ելքով դժբախտ պատահարները պարբերական բնույթ ունեն: Araratnews-ը փորձեց պարզել, թե Երևանի շենքերի վերելակների անսարքության համար ով է պատասխանատու:
«Վերելակները հանդիսանում են շենքի քաղաքացիների, համայնքների սեփականությունը: Երևանի վերելակները չեն գտնվում քաղաքապետարանի լիազորությունների ներքո»,- Araratnews-ին հայտնեցին Երևանի քաղաքապետարանի տեղեկատվության և հասարակայնության հետ կապերի վարչությունից:
Այն հարցին, թե՝ Երևանի քաղաքապետարանը պատասխանատվություն չի՞ կրում արդյոք քաղաքի շենքերի վերելակների անսարքության պատճառով տեղի ունեցած դժբախտ պատահարների համար՝ տեղեկատվության և հասարակայնության կապերի վարչությունից պատասխանեցին, որ պատասխանատվություն չի կրում, քանի որ իր իրավասության տակ չէ այս ոլորտը:
Երևանի վարչական շրջանների հետ կապվելով պարզվեց, որ շենքերի վերելակների անսարքությունների պատասխանատվությունը ամբողջովին ընկնում է համայնատիրությունների վրա: Սակայն, կապ հաստատել համայնատիրության վերելակների գծով պատասխանատուների հետ այդպես էլ չհաջողվեց:
Հիշեցնենք, որ այսօր առավոտյան Երևանի Բեկնազարյան փողոցի տներից մեկի վերելակի դռների արանքում մնացել է երեխա, որի արդյունքում «Արմենիա» ԲԿ տեղափոխվելու ընթացքում երեխան մահացել է:
