Այսօր Հայաստանը նշում է Անկախության տոնը։ Այս տարի լրացավ անկախության հռչակման 26-ամյակը։
1991 թվականի սեպտեմբերի 21-ին Հայաստանի ժողովուրդը ձայների գերակշիռ մեծամասնությամբ քվեարկեց ԽՍՀՄ-ի կազմից դուրս գալու եւ անկախ պետություն ստեղծելու օգտին:
Հետագա տարիները պետք է դառնային դժվարությամբ ձեռք բերված անկախությունը պահելու տարիներ: Անկախությունն արժեք է, որը գնահատել է պետք, անկախությունը յուրաքանչյուր պետության այսօրվա ու վաղվա ապագան է: Երիտասարդ, բայց կայացած պետություն` այսպես են որակում գործող իշխանությունները Հայաստան երկիրը: Անցնող տարիների ընթացքում պետականության կայացման ուղղությամբ քայլեր ձեռնարկվել են, սակայն բավարա՞ր են դրանք. միանշանակ՝ ո´չ: Անկախությունը դե յուրե հաստատած պետությունը այն նախ եւ առաջ պետք է ամրագրի դե ֆակտո: Այս կարծիքին են մայրաքաղաքի բնակիչները:
Անկախության կրող. այսպես է իրեն բնորոշում Ազատուհի Արասխանյանը: Նա եւ Հայաստանի անկախությունը տարեկիցներ են: 26-ամյա Ազատուհին պատմում է, որ լույս աշխարհ է եկել սեպտեմբերի 21-ի վաղ առավոտյան: Ծնողները որոշել էին իրեն այլ անունով կոչել, բայց երբ հանրաքվե անցկացնողները գալիս են հիվանդանոց, Ազատուհու ծնողները «այո» են ասում, ապա քննարկում, թե ի´նչ անուն տան դստերը՝ Հայաստա՞ն, թե՞ Անկախուհի: Ընդհանուր հայտարարի են գալիս եւ աղջկան կոչում Ազատուհի:
Ծննդյան օրը Ազատուհին նախընտրում է անցկացնել ընկերների շրջապատում: Նախընտրելի վայր էլ ունի, հիմնականում ընտրում է այնպիսի վայրեր, որտեղից մայրաքաղաք Երեւանն ամբողջությամբ երեւում է: Հպարտ է, որ լույս աշխարհ է եկել հենց սեպտեմբերի 21-ին: Բնավորությամբ ազատ է, ասում է` անկախությունը բառերով նկարագրել չի կարող, այն ամեն ոք պետք է իր մեջ կրի:
Սեպտեմբերի 21-ին բազմաթիվ շնորհավորանքներ է ստանում, ժպիտով ասում է՝ Հայաստան պետությանն ուղղված շնորհավորական խոսքերից իհարկե տարբերվում են: «Ինչպիսի՞ Հայաստան է ուզում տեսնել Ազատուհին» հարցի պատասխանն արագ է հնչում. «Չդատարկվող երկիր, Հայաստանը պետք է դառնա յուրաքանչյուր հայի բնակության երկիրը»:
Անկախության կրողները երիտասարդներն են: Նրանցն է ներկան ու ապագան: Անկախությունը նաեւ գին ունի: Այն վճարել են հերոսները՝ անկախության կերտման ճանապարհին նվիրաբերելով իրենց կյանքը: Հատկապես այսօր իշխանության ներկայացուցիչների կողմից շնորհավորանքների պակաս չի լինի: Վաղուց հերթապահ դարձած մտքերը սպառել են իրենց:
Հայաստանի անկախությունը 26 տարեկան է: Իսկ անկախությունը եւ երկիրը բառերով չեն սիրում:
Շնորհավո´ր տոնդ, Հայաստանի Հանրապետության ազատ ու հպա´րտ քաղաքացի:
Փայլակ Ֆահրադյա
