ԱՄՆ-ում ոստիկանությունը ձերբակալել է 21-ամյա Դիլան Ռուֆին, որին կասկածում են Չարլսթոնի եկեղեցում հրաձգությունը կազմակերպելու մեջ: Այս մասին մամուլի ասուլիսի ժամանակ հայտարարել է քաղաքի ոստիկանապետ Գրեգ Մալլենը:
Նրա խոսքով, երիտասարդին բռնել են հարեւան Հյուսիսային Կարոլինա նահանգի Շելբի քաղաքում: Կասկածյալին արդեն հարցաքննում են:
ՏԱՍՍ-ի փոխանցմամբ, ոստիկանությունում նաեւ հաղորդել են, որ հանցագործը միայնակ է գործել, համախոհներ չի ունեցել: Կասկածյալին ձերբակալելու հարցում օգնել են տեղի զգոն բնակիչները:
ՌԻԱ Նովոստին հիշեցնում է, որ հրաձգությունը տեղի է ունեցել հունիսի 17-ի երեկոյան, Չարլսթոնի սեւամորթ բնակչության շրջանում մեծ հարգանք վայելող եկեղեցում: Հանցագործության զոհ է դարձել 9 մարդ՝ 6 կին եւ 3 տղամարդ, այդ թվում՝ եկեղեցու հոգեւորականը եւ Հարավային Կարոլինայի օրենսդիր ժողովօ սենատոր Քլեմենտ Փինքնին:
Ոստիկանությունում կարծում են, հանցանքի շարժառիթը ռասայական հողի վրա ատելությունն է:
