Կուբայի և ԱՄՆ հարաբերությունների բարելավումը հնարավոր է միայն այն դեպքում, եթե պաշտոնական Վաշինգտոնը վերջ դնի միակողմանի պատժամիջոցների քաղաքականությանը:
Նման հայտարարությամբ հանդես է եկել Կուբայի արտաքին գործերի նախարարը Հավանայում՝ երկու երկրների միջև բանակցությունների մեկնարկից առաջ: Այս մասին տեղեկացնում է Reuters-ը:
«Միակողմանի պատժամիջոցներն արդեն իսկ բավականին մեծ նյութական և հումանիտար վնաս են հասցրել Կուբայի ժողովրդին: ԱՄՆ պիտի դադարեցնի դրանք, եթե իրոք շահագրգռված է երկու երկրների միջև հարաբերությունների բարելավմամբ:
Մոտ օրերս Հավանայի և Վաշինգտոնի ներկայացուցիչները կառուցողական քննարկում կանցկացնեն՝ հիմնված փոխադարձ հարգանքի և միջազգային իրավունքի նորմերի վրա:
Բանակցությունները տեղի են ունենում երկու սուվերեն պետությունների միջև, որոնք փոխադարձաբար պիտի զերծ մնան մյուսի ներքին գործերին միջամտելուց և ազգային ինքնիշխանությունը ոտնահարելուց»,- նշել է դիվանագետը:
Կուբայի արտաքին գերատեսչության ղեկավարը հավելել է, որ իր կողմը պատրաստ է քննարկման առարկա դարձնել յուրաքանչյու հարց՝ այդ թվում թմրամիջոցների առևտրի դեմ պայքարը, անօրինական միգրացիան, շրջակա միջավայրի աղտոտումը վերաբերող հարցեր:
Հիշեցնենք, որ դեկտեմբերին ԱՄՆ-ի և Կուբայի ղեկավարները հայտարարեցին դիվանագիտական հարաբերությունների կարգավորման մասին: Ինչից հետո Հավանայի և Վաշինգտոնի միջև հարաբերությունների կարգավորման շրջանակներում կողմերի միջև քաղբանտարկյալների ազատ արձակման մասին պայմանավորվածություն էր ձեռք բերվել, և Կուբայի իշանությունները ազատ արձակեցին 53 ամերիկացի բանտարկյալների:
