Սահմանում իրավիճակը լարված է, և հակառակորդը ոչ թե ինչ-որ հատվածներով է խախտում զինադադարը, այլ՝ սահմանի գրեթե ողջ երկայնքով: Ադրբեջանի գործողությունները մարտահրավեր են միջազգային հանրությանը: Այս մասին Araratnews.am-ի հետ զրույցում ասաց ԼՂՀ նախագահի մամուլի խոսնակ Դավիթ Բաբայանը: Վերջինիս խոսքով՝ Ադրբեջանի այս գործողությունները 1994թ-ից այս կողմ կարելի է համարել աննախադեպ: Դավիթ Բաբայանի փոխանցմամբ` հակառակորդի կողմից կիրառվել են տարբեր տիպի ծանր զինատեսակներ, սակայն ստացել են համարժեք պատասխան:
«Մենք միշտ ասել ենք, որ Ադրբեջանի նման պահվածքը, նման աքլորությունը չի կարող լինել միայն Ադրբեջանի նախաձեռնությունը: Ըստ երևույթին` նրա մեջքին կանգնած են որոշ ուժեր` մասնավորապես` Թուրքիան: Այսպիսի զարգացումները, հատկապես` Վաշինգտոնում տեղի ունենալիք հանդիպումների ընթացքում, որտեղ քննարկվում են կարևորագույն հարցեր, իսկ Ալիևը գնում և հանդես է գալիս որպես ահաբեկիչ, արդեն ահազանգ են բոլորի համար», -ասաց Դավիթ Բաբայանը: Արցախի նախագահի խոսքով՝ Ադրբեջանը միջազգային հանրության կողմից պետք է համարժեք գնահատականի արժանանա:
Նշենք, որ իրավիճակը ղարաբաղա-ադրբեջանական հակամարտ զորքերի շփման գծում խիստ լարված է: ՀՀ ՊՆ -ից պարբերաբար տեղեկատվություն են տարածում իրավիճակի վերաբերյալ: ՀՀ ՊՆ մամուլի խոսնակ Արծրուն Հովհաննիսյանը տեղեկացրել է, որ երկու կողմներն էլ ունեն զոհեր: Այս պահին հայտնի է, որ հայկական կողմից սպանվել է 12-ամյա երեխա, եւս երկուսը վիրավորվել են:
ԼՂՀ-ի ողջ սահմանի երկայնքով ընթանում են մարտեր. Արծրուն Հովհաննիսյան
Հայկական զինուժը ադրբեջանական ուղղաթիռ է խոցել
Երկու կողմերն էլ զոհեր ունեն. ՊՆ խոսնակ
