«ՀՀ նախագահի դեպի Ռուսաստան այցից առաջ հայկական կողմը էդուրարդ Նալբանդյանի շուրթերով իր դժգոհությունը հայտնեց, որ այս տարիների ընթացքում, հիմա էլ՝ Ռուսաստանը շարունակում է զենք և զինամթերք վաճառել Ադրբեջանին և դա այն դեպքում, երբ Մինսկի խմբի համանախագահ երկրներից երկուսը կտրականապես հրաժարվում են որևիցե զենք և զինամթերք վաճառել Հայաստանին և Ադրբեջանին»,-araratnews.am-ի հետ զրույցում արտաքին գործերի նախարար Էդուարդ Նալբանդյանի դժգոհությանն անդրադարձավ քաղաքագետ Գագիկ Համբարյանը:
Հիշեցնենք, որ Kommersant ռուսական թերթին տված հարցազրույցում, Էդուարդ Նալբանդյանը խոսելով ռուս-ադրբեջանական հարաբերությունների մասին, զգուշորեն քննադատել էր Ռուսաստանի` Ադրբեջանին զինամթերք վաճառելու փաստը:
Քաղաքագետը նաև նշեց, որ որպես ՀԱՊԿ անդամ, Ռուսաստանը Հայաստանին ևս զենք է վաճառում, որի քանակն անհամեմատելի է Ադրբեջանին վաճառված զինտեխնիկայի քանակի հետ. տարբերությունը՝ ի օգուտ Ադրբեջանի է.«Դրա համար ՀՀ-ն և ԼՂՀ-ն ինքնըստինքյան իրենց դժգոհությունն են հայտնում է, և դա շատ նորմալ է: Ես հույս ունեմ, որ ռուս-թուրքական հարաբերությունների վատթարացումից հետո տարածաշրջանում իրավիճակի սրումը ևս մեկ անգամ Մոսկվային ապացուցեց, որ պաշտոնական Բաքուն ամբողջությամբ կանգնած է իր ավագ «եղբայր» Անկարայի կողքին և եթե ռուս-թուրքական հարաբերություններն էլ ավելի սրվեն, ապա Ադրբեջանը բացեիբաց կպաշտպանի Թուրքիային»:
Գագիկ Համբարյանի կարծիքով՝ նաև ճիշտ չեն այն հայտարարությունները, թե ոչ ոք չի կարող սեպ խրել Ռուսաստանի և Ադրբեջանի հարաբերություններում.«Մոսկվան իբրև թե ցանկանալով առանձնացնել հարաբերությունները Բաքվի հետ, երազանքների մեջ է ընկնում և հայտարարում, որ ոչ ոք չի կարող սեպ խրել Ռուսաստանի և Ադրբեջանի հարաբերություններում: Իհարկե, սա այդպես չէ և պետք եկած ժամանակ Անկարան կպարտադրի Բաքվին, որպեսզի ինքը վերջնական ընտրություն կատարի, և Բաքուն իր վերջնական ընտրությունը կկատարի հօգուտ Անկարայի: Բացի դրանից, պետք է նշեմ, որ վերջին տարիների Ադրբեջանի արտաքին քաղաքականությունը տարածաշրջանում ցույց է տալիս, որ Ադրբեջանը ամեն ինչ անում է, որպեսզի Ռուսաստանի դիրքերը Հարավային Կովկասում կտրուկ թուլանան: Նույն Ադրբեջանի և իր թիկունքում կանգնած ուժերի կողմից վարվող գազային և նավթային քաղաքականությունը ցույց է տալիս, որ Ադրբեջանը չի կարող լինել Ռուսաստանի ոչ բարեկամը, ոչ է՝լ դաշնակիցը: Ինքը հակառակորդ է բոլոր առումներով և եթե ուսումնասիրում ենք ադրբեջանական՝ կոնկրետ իշխանամետ մամուլը, տեսնում ենք, որ 99 տոկոս հոդվածները, որոնք Ռուսաստանի արտաքին քաղաքականության մասին են՝ հակառուսական են»:
