ԱԺ ՀՅԴ խմբակցության ղեկավար Արմեն Ռուստամյանն այն կարծիքին է, որ դեռևս պետք չէ սառեցնել Ընտրական օրենսգրքի քննարկումը, որովհետև նախապես սառեցման ճանապարհով գնալը կարող է սխալ տեղ հասցնել: Այս մասին այսօր խորհրդարանում լրագրողների հետ զրույցում նշեց պատգամավորը, հավելելով, որ չնայած հաշվի առնելով, թե ով է հակառակորդը, հանավոր է ամեն ինչ սառեցվի: Արմեն Ռուստամյանի խոսքով՝ սակայն, կարևոր է նաև ԸՕ-ի ընդունումը մինչև հունիսի մեկը, որովհետև այն պետք է ընտրություններից առնվազն մեկ տարի առաջ արդեն ընդունված լինի: «Ես չեմ ուզում այդ աստիճան վատատես լինել, բայց նաև չեմ բացառում նման իրավիճակը՝ նկատի ունենալով, թե ինչ հարևանի հետ գործ ունենք, ով թքած ունի ցանկացած միջազգային պարտավորության, նորմերի և այլնի վրա: Անում է այն, ինչ խելքին փչում է, հիմա էլ մտնում է մի պրոցեսի մեջ, որից ուզում է պարզ երեսով դուրս գալ: Դրա համար բացարձակապես հաշվի չի նստում իր կորուստների հետ: Այսպես ասած, «մսացուի » նման բերում են զինվորներ, մարդիկ, որպեսզի կարողնանա ինչ-որ տարածքներ գրավի, որպեսզի փաստեն, որ կարող են իրենք իրենց տաածքներ գրավել, որպեսզի ստատուս քվոն փոխվի հօգուտ իրենց: Սա է իրենց նպատակը »:
Արմեն Ռուստամյանի խոսքով` դա է ադրբեջանական կողմի գլխավոր նպատակը, որովհետև այդ քայլով ցանկանում է փաստի առաջ կանգնեցնել միջազգային հանրությանը, որպեսզի նրանք հաշվի նստեն Ադրբեջանի «նվաճումների,, հետ և համապատասխան փոփոխություն մտցվի բանակցային գործընթացի մեջ: « Սա արվում է հին ժամանակներ հիշեցնող ոճով »,-նշեց Ռուստամյանը: Բացի այդ, պատգամավորը նշեց, որ պետք է երկու ճակատը միաժամանակ ակտիվ պահել , առաջին հերթին մարտի դաշտում, որովհետև այնտեղ է լուծվում ամեն ինչ. «Փառք Աստծո, որ մոբիլիզացիան իրական է, և սա ազդելու է իրենց վրա, առնվազն ապրիլի մեկի դիրքերը պետք է պաշտպանենք, եթե շատ ոգևորվեն և փորձեն իրենց մարտավարությունը թելադրեն մեզ , ապա մենք պետք է միջոցներ ձեռնարկենք: Կայունությունն ու անվտանգությունն ապահովելու համար նոր դիիրքեր վերցնենք, որովհետև այդպես է եղել, որ հրադադար է եղել:Հրադադարը եղավ այն պարզ պատճառով, որ իրենք տեսան, որ պատերազմը շարունակելն ավելի վնասաբեր է: Ես նախկինում էլ եմ ասել, մենք երևի մեծ զիջում արեցինք, որ գնացինք հրադադարի, պետք է գնայինք կապիտուցիոն պայմանագրի կնքման ճանապարհով, որովհետև իրենք այդ ժամանակ թուլացված, պարալիզացված վիճակում էին: Մենք պարզապես բարի կամք դրսևորելով, լսելով միջորդ կողմերին, կանգնել ենք այդ գծի վրա, հիմա իրենց չգիտես, ինչու թվում է, թե այդ գիծը կարող են շարժել »:
ՀՅԴ խմբակցության ղեկավարի խոսքով՝ մյուս կարևոր հարցը միջազգային ատյաններում տարվելիք աշխատանքն է, որ պետք է լուրջ խնդիրներ առաջ քաշենք և լուծել, պետք է ֆիքսել, թե ով է սկսել պատերազմը և դրա շուրջ իրականությանը մոտ քննարկումներ անցկացնել կողմերի հետ: Արմեն Ռուստամյանը չբացառեց, որ ԵԽԽՎ-ում ևս հակամարտության թեման քննարկվի:
